Օգտատեր Ռոբերտ Բարսեղյանի ֆեյսբուքյան գրառումը. «ԱՄՆ-ի պաշտպանության նախարարին դիտողություն են արել Անհայտ զինվորի շիրիմի մոտ։ Փենթագոնը պաշտպանել է պահակախմբի զինծառայողին
ԱՄՆ-ի Արլինգթոնի ազգային գերեզմանատանն ուշագրավ միջադեպ է տեղի ունեցել։ ԱՄՆ-ի բանակի 3-րդ հետևակային գնդի պատվո պահակախմբի զինծառայողը դիտողություն է արել պաշտպանության նախարար Փիթ Հեգսեթին և նրան ուղեկցող անձանց՝ Անհայտ զինվորի շիրիմի մոտ սահմանված վարքականոնը խախտելու համար։
Միջադեպը տեղի է ունեցել Վետերանների օրվան նվիրված արարողությունից հետո։ Ըստ տարածված տեղեկությունների՝ նախարարին ուղեկցող խմբի անդամները հուշահամալիրի տարածքում սկսել են բարձրաձայն խոսել և լուսանկարվել՝ խախտելով այդ վայրում գործող խիստ կանոնները։
Պատվո պահակախմբի զինծառայողը միջամտել է՝ պահանջելով պահպանել լռությունն ու հարգանքը հուշահամալիրի նկատմամբ։
Հատկանշական է, որ Փենթագոնը պաշտպանել է զինծառայողի գործողությունները՝ ընդգծելով, որ Արլինգթոնի ազգային գերեզմանատան և Անհայտ զինվորի շիրիմի մոտ գործող կանոնները բոլորի համար նույնն են՝ անկախ զբաղեցրած պաշտոնից։
Հենց նման իրավիճակներում էլ երևում է, թե որքան կայացած են պետական ինստիտուտները։ Երբ պաշտոնը ոչ մեկին արտոնություն չի տալիս, իսկ կանոնները նույնն են բոլորի համար՝ անկախ նրանից՝ շարքային քաղաքացի ես, թե երկրի պաշտպանության նախարար։ Սա է իրականում գործող համակարգի և ինստիտուցիոնալ մշակույթի կարևոր ցուցիչը»:
