julbaz.mediamonitoring.am

Մեծ Բրիտանիայի վարչապետ Քիր Սթարմերը հայտարարել է, որ Լոնդոնը չի աջակցի ԱՄՆ-ի կողմից Հորմուզի նեղուցի շրջափակմանը։ Այս մասին նա ասել է BBC Radio 5 Live-ին։ «Մենք չենք աջակցում շրջափակմանը», – ասել է նա՝ հավելելով, որ նեղուցի վերաբացումը կենսական նշանակություն ունի։ «Իմ կարծիքով, կենսական նշանակություն ունի, որ մենք նեղուցը բացենք և ամբողջովին բացենք, և վերջին մի քանի շաբաթվա ընթացքում մենք այդ ուղղությամբ ներդրել ենք մեր բոլոր ջանքերը և կշարունակենք դա անել», – ասել է նա։

Սթարմերը նաև նշել է, որ անկախ ճնշումից՝ Մեծ Բրիտանիան չի ներքաշվի Իրանի շուրջ պատերազմի մեջ։ «Իմ որոշումը շատ հստակ է եղել, որ անկախ ճնշումից, ընդ որում եղել է զգալի ճնշում, մենք չենք ներքաշվի պատերազմի մեջ», – շեշտել է նա։

Իր հերթին Իսպանիայի պաշտպանության նախարար Մարգարիտա Ռոբլեսն Իսպանիայի հանրային հեռուստատեսությանը տված հարցազրույցում ասել է, որ շրջափակումն «անիմաստ է»։ «Ես կարծում եմ, որ սա անիմաստ բան է… Սա ևս մեկ դրվագ է այս ամբողջ անկման պարույրում, որի մեջ մենք ներքաշվել ենք», – նշել է նա։

ԱՄՆ զինված ուժերը հայտարարել են, որ ապրիլի 13-ից կսկսեն Իրանի նավահանգիստներ և ափամերձ տարածքներ մտնող և այնտեղից դուրս եկող ամբողջ ծովային երթևեկության շրջափակումն այն բանից հետո, երբ Իրանի հետ բանակցությունները ձախողվել են։ ԱՄՆ նախագահ Թրամփը հայտարարել էր, որ այդ նախաձեռնությանը կմիանան նաև այլ երկրներ։

Տարածաշրջանում աճող լարվածության ֆոնին Իրանում Իսպանիայի դեսպանը հայտարարել է Թեհրանում դիվանագիտական ​​​​առաքելության պաշտոնական բացման մասին: Դիվանագիտական ​​​​առաքելության ղեկավարը ընդգծել է, որ որոշումը կայացվել է Իսպանիայի արտաքին գործերի նախարարի հրահանգներին համապատասխան:

Դեսպանը նշել է, որ ինքը և իր թիմը վերադառնում են աշխատանքի՝ «հնարավորության սահմաններում» խաղաղապահ ջանքերին նպաստելու համար:

Երևանի ենթակայության նախադպրոցական ուսումնական հաստատություններում տեղադրված տեսախցիկների միջոցով 2026 թվականի առաջին եռամսյակի ընթացքում իրականացված վարչարարության արդյունքում 4 աշխատակից ազատվել է աշխատանքից, նրանցից մեկը տնօրեն է։ Այս մասին Երևանի քաղաքապետարանում կայացած գործակարգավարական նիստի ժամանակ ասաց հանրակրթության վարչության պետ Մարգարիտ Խաչատրյանը։

«Հաշվետու ժամանակահատվածում իրականացված վարչարարության արդյունքում 6 աշխատակցից պահանջվել է բացատրություն և տրվել խիստ նախազգուշացում, 7 աշխատակցի նկատմամբ կիրառվել է կարգապահական տույժ՝ նկատողություն»,-ասաց նա՝ հավելելով, որ երեխաների նկատմամբ ոչ միանշանակ վերաբերմունք ենթադրող արձանագրումները կազմել են 64 տոկոս։ Մարգարիտ Խաչատրյանը տեղեկացրեց նաև, որ Երևանում գործող 42 նախադպրոցական հաստատությունում արդեն  տեղադրվել են տեսախցիկներ։ Եվս  58-ում նախատեսվում է տեսախցիկներ տեղադրել առաջիկայում։