ՄԱԿ-ի գլխավոր քարտուղար Անտոնիու Գուտերեշը կոչ է արել Բիշքեկում հավաքված համաշխարհային առաջնորդներին «դադարեցնել խելագարությունը» և վերջ դնել համաշխարհային պատերազմներին։
Շանհայի համագործակցության կազմակերպության (ՇՀԿ) գագաթնաժողովի շրջանակում Ղրղզստանի մայրաքաղաքում Euronews-ին տված հարցազրույցում ՄԱԿ-ի գլխավոր քարտուղարն ընդգծել է, որ հանդիպումը բացառիկ հնարավորություն է հարցն ուղղակիորեն ներկայացնելու այն մարդկանց, որոնք կարող են գործել այդ ուղղությամբ։
«Շատ կարևոր ուղերձ է ասելը՝ ժամանակն է դադարեցնելու այս խելագարությունը։ Ժամանակն է խաղաղության։ Եվ այս գործընթացների որոշ հիմնական դերակատարներ այստեղ են», – նշել է Գուտերեշը։
«Մեզ ավելի շատ անհանգստացնում է այն փաստը, որ մենք ունենք հակամարտություններ, որոնք, կարծես, անվերջ են։ Սա ճշմարիտ է Ռուսաստանի և Ուկրաինայի պարագայում։ Սա ճիշտ է Մերձավոր Արևելքի հետ կապված՝ Գազայից մինչև Իրանի և Միացյալ Նահանգների բախում»,- հավելել է նա։
Իրանի վերաբերյալ Գուտերեշը նշել է, որ հարվածները վերսկսվել են, և կոչ է արել կողմերին վերադառնալ բանակցություններին, որոնք, նրա խոսքով, մոտ են հաջողության։
«Մենք ավելի ու ավելի ենք ապրում բազմաբևեռ աշխարհում։ Եվ ակնհայտ է, որ ՄԱԿ-ի նման կազմակերպության համար չափազանց կարևոր է համագործակցել տարածաշրջանային կազմակերպությունների հետ՝ լինի դա Եվրամիությունը, Աֆրիկյան Միությունը, թե Շանհայի համագործակցության կազմակերպությունը»,- նշել է նա։
