julbaz.mediamonitoring.am

Իրանի ազգային անվտանգության բարձրագույն խորհրդի քարտուղար Մոհսեն Ռեզաին այն երկրներին, որոնց տարածքում տեղակայված են ամերիկյան ռազմաբազաներ, զգուշացրել է Իրանի դեմ ռազմական գործողությունների համար դրանց օգտագործման անթույլատրելիության մասին, հաղորդում է «Իրանցի լրագրողի օրագիրը» թելեգրամյան ալիքը։

Ալիքի տվյալներով՝ նա այդ պետություններին կոչ է արել չաջակցել Վաշինգտոնին նման գործողություններում՝ ընդգծելով, որ Թեհրանը նախապես զգուշացնում է հնարավոր հետևանքների մասին, որպեսզի հետագա սրման դեպքում մյուս երկրներն արդարացումներ չունենան։

«Ցանկացած տարածք, որտեղից օդ են բարձրանում ամերիկյան ինքնաթիռները, մեզ համար սպառնալիք կհամարվի»,- հայտարարել է Ռեզաին։

Նա ընդգծել է, որ Իրանը նման դիրքորոշումը համարում է իր բնական իրավունքը, որը նախատեսված է միջազգային իրավունքով և ՄԱԿ-ի կանոնադրությամբ։

Նիդերլանդների աջ լիբերալ Ժողովրդական կուսակցությունը հանուն ազատության և ժողովրդավարության (VVD) հինգշաբթի իշխող կոալիցիայի իր գործընկերներին մեղադրել է կոալիցիոն համաձայնագիրը խախտելու մեջ։ Հարկային բարեփոխման շուրջ տարաձայնություններն այնքան են սրվել, որ սպառնալիքի տակ են դրել փոքրամասնության կառավարության գոյությունը, հաղորդում է dpa-ն։

Ըստ VVD-ի խորհրդարանական խմբակցության ղեկավար Ռուբեն Բրեկելմանսի՝ կոալիցիոն գործընկերները՝ վարչապետ Ռոբ Յետենի «Դեմոկրատներ 66» (D66) կուսակցությունը և «Քրիստոնեա-դեմոկրատական կոչը» (CDA), ձախ ընդդիմության հետ համաձայնության են եկել այսպես կոչված միլիոնատերերի հարկի ներդրման շուրջ։

VVD-ն չի աջակցի այդ համաձայնությանը։ «Մենք չենք կարող այս կերպ համատեղ աշխատել»- հայտարարել է Բրեկելմանսը՝ կոչ անելով «հիմնովին վերագործարկել կոալիցիան»։

Յետենի եռակուսակցական կառավարությունն աշխատանքի է անցել ինն ամսից էլ պակաս ժամանակ առաջ։ Սակայն այն մեծամասնություն չունի խորհրդարանի երկու պալատներից ոչ մեկում և օրենքներ ընդունելու համար ստիպված է պայմանավորվել ընդդիմադիր կուսակցությունների հետ։

Հարկային համակարգի փոփոխության շուրջ ամիսներ տևած բանակցությունները բեկում չեն ապահովել։ Այժմ VVD-ն մտադիր է աջակցություն փնտրել ծայրահեղ աջ կուսակցությունների շրջանում, մինչդեռ D66-ն ու CDA-ն համաձայնել են ձախ ուժերի հետ փոխզիջման, որը նախատեսում է բարձր եկամուտներ ունեցող քաղաքացիների հարկերի բարձրացում։

Հինգշաբթի ավելի ուշ Յետենը պետք է ելույթ ունենա խորհրդարանում։ Ավելի վաղ՝ քաղաքական ճգնաժամի ֆոնին, նա չեղարկել էր Դուբլինում անցկացվելիք Եվրոպական քաղաքական համայնքի գագաթնաժողովին մեկնելու իր այցը։

Իռլանդիայի մայրաքաղաք Դուբլինում ընթացող Եվրոպական քաղաքական համայնքի 9-րդ գագաթնաժողովի շրջանակներում Հայաստանի Հանրապետության վարչապետ Նիկոլ Փաշինյանը 2026 թվականի նոյեմբերի 12-ին հանդիպել է Ադրբեջանի Հանրապետության նախագահ Իլհամ Ալիևի հետ։

Ղեկավարները մտքեր են փոխանակել Ադրբեջանի և Հայաստանի միջև խաղաղության օրակարգի առաջմղման շուրջ՝ հիմնվելով 2025 թվականի օգոստոսի 8-ին Վաշինգտոնում կայացած խաղաղության գագաթնաժողովի արդյունքների և դրա շրջանակներում ստորագրված Վաշինգտոնյան համատեղ հռչակագրի վրա։

Քննարկումները կենտրոնացած էին երկու երկրների միջև խաղաղության հետագա ամրապնդմանն ուղղված գործնական քայլերի վրա, այդ թվում՝ տրանսպորտային և տարանցիկ կապերի զարգացման, տնտեսական ու առևտրային հարաբերությունների, սահմանների սահմանազատման, ինչպես նաև վստահության ամրապնդման միջոցառումների իրականացման շուրջ։

Այս համատեքստում, ղեկավարները քննարկել են «Թրամփի ուղի՝ հանուն միջազգային խաղաղության և բարգավաճման» (TRIPP) զարգացման ընթացքը, այդ թվում՝ դրա երկաթուղային և ավտոճանապարհային բաղադրիչների պլանավորումն ու նախագծումը, ինչպես նաև TRIPP-ի երթուղով տարանցիկ կապերի հեռանկարները։

Որպես դրական զարգացում նշվել է Ադրբեջանի տարածքով դեպի Հայաստան և Հայաստանից ապրանքների տարանցումը։ Անցյալ տարվա նոյեմբերից ի վեր Ադրբեջանի տարածքով Հայաստան է տեղափոխվել, ընդհանուր առմամբ, 105 000 տոննա բեռ։

Կողմերը նաև մտքեր են փոխանակել Ադրբեջանի և Հայաստանի միջև տնտեսական ու առևտրային հարաբերությունների հետագա զարգացման հնարավորությունների, այդ թվում՝ էլեկտրաէներգետիկ ցանցերի առաջիկա փոխկապակցման շուրջ։

Ղեկավարներն ընդգծել են շրջակա միջավայրի և անդրսահմանային ջրային ռեսուրսների ոլորտում համագործակցության կարևորությունը և ողջունել անդրսահմանային գետերի կառավարման հարցերով աշխատանքային խմբերի ստեղծումը։

Ղեկավարները վերահաստատել են խաղաղության գործընթացում դրական դինամիկայի պահպանման, ինչպես նաև տարածաշրջանում խաղաղության, կայունության և բարգավաճման ամրապնդմանն ուղղված երկխոսության շարունակման կարևորությունը։

Դուբլինում՝ Եվրոպական քաղաքական համայնքի գագաթնաժողովի շրջանակներում Հայաստանի ԱԳՄԱ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը կարճատև զրույց են ունեցել: