ԱՄՆ նախագահ Դոնալդ Թրամփը հանդես է եկել Հորմուզի նեղուցի անվանումը փոխելու առաջարկով: Այդ մասին նա գրել է Truth Social սոցիալական ցանցի իր էջում։
«Քանի որ այն այժմ գտնվում է ԱՄՆ-ի վերահսկողության տակ, արդյո՞ք չպետք է Հորմուզի նեղուց անվանումը փոխենք «ԹՐԱՄՓԻ ՆԵՂՈՒՑԻ»։ Ինչպես հենց Ամերիկան, այն ավելի «թեժ» կլինի, քան երբևէ»,- գրել է նա։
Գագիկ Խաչատրյանի իրավունքների երաշխիքների առնչությամբ Մարդու իրավունքների պաշտպանի գրասենյակից հայտնում են.
«Ինչպես ավելի վաղ տեղեկացրել էինք, Մարդու իրավունքների պաշտպանի հանձնարարությամբ այց է իրականացվել քրեակատարողական հիմնարկ՝ Գագիկ Խաչատրյանին տեսակցելու և նրա իրավունքների ապահովման վիճակին տեղում ծանոթանալու նպատակով:
Այցի ընթացքում տեղի է ունեցել առանձնազրույց վերջինիս հետ, ուսումնասիրության առարկա են դարձել Գ. Խաչատրյանի իրավունքների ապահովման վիճակը, այդ թվում՝ բժշկական օգնության և սպասարկման վերաբերյալ հարցերը, ինչպես նաև վերջինիս պահման պայմանները: Առանձնազրույցի բովանդակությունը խորհրդապահական է և ենթակա չէ հրապարակման։
Միևնույն ժամանակ, առանձնազրույցի ընթացքում բարձրացված խնդիրները արդեն իսկ հասցեավորվել են իրավասու մարմինների հետ քննարկումների ընթացքում, դրանց մի մասը` ընթացքում ստանում է լուծում։
Մարդու իրավունքների պաշտպանն ընդգծում է, որ եթե պետությունը հաշմանդամություն ունեցող անձի նկատմամբ կիրառում է կալանք խափանման միջոցը, պետք է երաշխավորի ազատությունից զրկման այնպիսի պայմաններ, որոնք համապատասխանում են նրա հատուկ կարիքներին:
Այդ առումով պետության պարտականությունն է ապահովել ազատությունից զրկված անձի առողջության պահպանման, այդ թվում՝ բժշկական օգնություն, հոգեբանական և հոգեթերապևտիկ աջակցություն, խնամքի անհրաժեշտության դեպքում` դրա կազմակերպում, ինչպես նաև առողջության համար բավարար սննդային արժեք ունեցող սննդամթերք ստանալու իրավունքը և այլ իրավունքները։
ՀՀ արդարադատության նախարարության քրեակատարողական հիմնարկներում հատուկ կարիքներ ունեցող ազատությունից զրկված անձանց պատշաճ խնամքի ապահովման խնդրին Մարդու իրավունքների պաշտպանը անդրադարձել է նաև մարդու իրավունքների և ազատությունների խախտման առկայության մասին մի շարք որոշումներում՝ շեշտելով, որ պետությունը պարտավոր է պոզիտիվ պարտականության ուժով ապահովել նման անձանց մշտական խնամքը հատուկ պատրաստված մասնագետների կողմից:
Մարդու իրավունքների պաշտպանը կարևորում է նաև ազատությունից զրկման վայրում անձի իրավաբանական օգնության իրավունքի անխափան երաշխավորումը:
Նշված հարցերի հասցեավորման վիճակն անընդհատ մշտադիտարկվում և մշտադիտարկվելու է Մարդու իրավունքների պաշտպանի հաստատության կողմից:
Պաշտպանն ընդգծում է, որ իրավասու մարմինները պետք է ունենան անհրաժեշտ գործիքներ ցանկացած քրեական վարույթով, այդ թվում` նշված գործով պատշաճ, օբյեկտիվ և համակողմանի քննություն իրականացնելու համար: Միևնույն ժամանակ, կարևոր է, որ այդ ընթացքում լիարժեք երաշխավորվեն անձի իրավունքները:
Գագիկ Խաչատրյանի իրավունքների ապահովմանն առնչվող հարցերի ուսումնասիրությունը ՄԻՊ աշխատակազմում շարունակվում է։ Հրապարակման ենթակա ընթացիկ տեղեկատվությունը կներկայացվի լրացուցիչ»:
193 անշարժ գույք, մասնավորապես 46 բնակարան
Կենտրոն վարչական շրջանում, 89 անշարժ գույք Կոտայքի մարզում, 29 իրավաբանական անձում
մասնակցություն, 14 շարժական գույք, շուրջ 1 միլիոն 451 հազար ԱՄՆ դոլարի չափով
ձեռք բերված պարտատոմսեր, շուրջ 147 հազար ԱՄՆ դոլար ավանդ, շուրջ 17 միլիարդ
761,5 միլիոն դրամ․․․ Սա ապօրինի ծագում ունեցող այն գույքերն են, որոնք դատախազությունը պահանջում է բռնագանձել ՊԵԿ նախկին նախագահ, ֆինանսների նախկին նախարար
Գագիկ Խաչատրյանից ու նրան փոխկապակցված անձանցից։ Երեկ, օրվա առաջին կեսին, երբ հայտնի
դարձավ, որ 2026թ. հունիսի 7-ին հարուցված հանրային քրեական հետապնդումը փոփոխվել և
լրացվել է, ինչպես նաև նոր հանրային քրեական հետապնդում է հարուցվել Խաչատրյանի նկատմամբ,
հանրությունը շոկի մեջ էր, բայց ոչ թե նախկին պաշտոնյայի վերաբերյալ հարուցված քրեական հետապնդումից, այլ գույքերի այն
ծավալից, որը թվարկվեց քիչ վերը։ Շատերն ապշահար
էին պետական ունեցվածքի, գանձարանի՝ ֆինանսների ու եկամուտների կառավարման համար պատասխանատու
նախկին պաշտոնյայի ախորժակից ու ագահության, անկշտում լինելու մասշտաբներից և այն մեքենայություններից,
հանցավոր, կոռուպցիոն սխեմաներից, որոնք գործի են դրվել այս կամ այն գույքը օտարելու կամ գրպանելու համար։
Օրվա երկրորդ կեսին արդեն փորձ արվեց ստվերել նրա վերաբերյալ հանրային նոր քրեական
հետապնդման հանգամանքը համացանց նետված տեսագրության միջոցով, որում երևում է, թե ինչպես
են անկողնուն գամված նախկին պաշտոնյային պատգարակի վրա տեղափոխում դատարան՝ քննելու
նրա վերաբերյալ կալանքի միջնորդությունը։ «Խոշտանգում, անմարդկային վերաբերմունք, ոնց
կարելի է․․․»,- հանրային շոկը սոցհարթակներում զուգակցվեց նաև ահա այսպիսի արձագանքներով։ Դատախազությունը, մինչդեռ, պնդում է, որ «հանձնաժողովային
փորձաքննության եզրակացությամբ արձանագրվել է, որ Խաչատրյանը չունի այնպիսի առողջական
խնդիրներ, որոնք կարող են խոչընդոտ հանդիսանալ նրա կողմից քրեական վարույթով որևէ վարութային
գործողության մասնակցելու համար»։
Դառնանք խոշտանգմանը, անմարդկային վերաբերմունքին.
ուսումնասիրելով նախկին սուպերնախարարի ունեցվածքի ծավալները՝ անհնար է չհանգել տրամաբանական
եզրահանգման՝ այդքան շարժական ու անշարժ գույքը, պարտատոմսերն ու միլիոնները արդյոք
հնարավո՞ր էր դիզել առանց խոշտանգման ու անմարդկային վերաբերմունքի, ընդգծենք՝ պետակա՛ն
ունեցվածքի, գանձարանի հանդեպ ցուցաբերված խոշտանգման ու անմարդկային վերաբերմունքի։ Հազիվ թե։ Նախկին պաշտոնյայի
դիզած գույքը, մեծ հավանականությամբ, այդպես էլ ստվերում կմնար, դրա ապօրինի ծագումը
Հակակոռուպցիոն դատարանը չէր քննի, եթե երկրում շարունակեր իշխել նախկին՝ Սերժ Սարգսյանի
ռեժիմը, որի հիմնասյուներից մեկն էլ ինքը՝ ՊԵԿ նախկին նախագահն ու նախկին նախարարն
էր։ Այն նույն Սերժ Սարգսյանի, որը առաջնորդվում էր հաջողության հետևյալ բանաձևով՝
Ազնվություն, գումարած պրոֆեսիոնալիզմ, հանած կոռուպցիա։
Ի՞նչն է ապշեցուցիչն ու շոկայինը՝ անկախությունից
ի վեր մինչև 2016 թվականը պետական կարևոր պաշտոններ զբաղեցրած Խաչատրյանի փաստաբանները
պնդում են, որ իրենց պաշտպանյալի ունեցվածքի օրինական լինելը կապացուցեն դատարանում,
ասել կուզի՝ Խաչատրյանն ինչ ունի, չունի՝ 190-ից ավելի գույքերը, ճակատի քրտինքով է վաստակել, ոչ մի ստվերային
գործարք։
Ի դեպ, ստվեր ասացինք, հիշեցինք, թե
ինչ էր ասում Գագիկ Խաչատրյանը ստվերի մասին, երբ նրան հարցնում էին ՀՀ-ում առկա ստվերի
մասին:
Խաչատրյանի այս խոստովանությունը ստվերի
մասին ապացույցն է այն բանի, որ պետական համակարգում իմացել ու չեն կանխարգելել պետբյուջե
վճարվելիք միջոցների գրպանումը։ Թե ում գրպաններն
են հոսել այդ միջոցները, որոնք պետք է ծառայեին այդ միջոցների սեփականատիրոջ՝ ՀՀ քաղաքացիների
կյանքի որակի բարելավմանը, թոշակների ու նպաստների, աշխատավարձերի բարձրացմանը, բանակաշինությանը,
առաջնագծի բարեկարգմանը, կարելի է եզրակացնել։ Այն չակերտավոր շների, որոնք պետք է
գառներին պաշտպանեին գայլերի հարձակումից, բայց, փաստորեն, գործակցել են գայլերի հետ՝
դրանից բխող հետևանքներով։ Հրանտ Մաթևոսյանի գրչած՝ «սերմացու գողացող մկների, թուխս գողացող
աղվեսների պես»։
Ի դեպ, երբ ժամանակին՝ 2013-ին (այդ ժամանակ, հիշեցնենք, Խաչատրյանը ՊԵԿ նախագահն
էր), Վերահսկիչ պալատի նախագահ Իշխան Զաքարյանը ԱԺ բարձր ամբիոնից ահազանգում էր պետական գանձարանի նկատմամբ իրականացվող ոտնձգությունների,
«ատկատների», մսխումների մասին՝ «գայլերի», «մկների» ու «աղվեսների» կողմից, պետության
գլուխը՝ Սերժ Սարգսյանը, համատարած թալանի դեմ միջոցներ ձեռնարկելու փոխարեն ջղայնանում,
ծառս էր լինում՝ Զաքարյանին մեղադրելով անհեռատեսության, քաղաքական հայտարարություններ
անելու մեջ։
Սերժ Սարգսյանն, արդ, երբ ժամանակին
«պուբլիչնի» կշտամբում էր կոռուպցիայի, պետական ալան-թալանի մասին ահազանգողներին,
արդյոք այսպիսով կանաչ լույս չէ՞ր վառում պոտենցիալ գագիկխաչատրյանների առաջ՝ նրանց
ազդակներ ուղարկելով՝ ինչ ուզում եք՝ արեք, մենակ թե ակուրատնի արեք։
Ի դեպ, 2016-ի սեպտեմբերին պաշտոնից
ազատված Խաչատրյանին Սերժ Սարգսյանի հրամանագրով 2011-ին շնորհվել է մաքսային ծառայության
գեներալ-լեյտենանտի հատուկ կոչում։ 2012-ին էլ նախկին նախարարը պարգևատրվել է Անանիա
Շիրակացի մեդալով, որը շնորհվում է տնտեսության, ճարտարագիտության, ճարտարապետության,
գիտության ու տեխնիկայի բնագավառներում նշանակալի գործունեության, գյուտերի և հայտնագործությունների
համար: Թե ինչ գյուտ կամ հայտնագործություն է արել Խաչատրյանը՝ մեզ հայտնի չէ, բայց
ենթադրում ենք՝ գյուտն ու հայտնագործությունը այս կամ այն կերպ առնչվել են պետական
ունեցվածքը ակուրատնի գրպանելուն։
Հեղինե Մանուկյան
Սեպտեմբերի 2-ին՝ ժամը 17։17-ին, ՆԳՆ 112 օպերատիվ կառավարման կենտրոն ահազանգ է ստացվել, որ Քուչակ-Ապարան ճանապարհահատվածում տեղի է ունեցել ճանապարհատրանսպորտային պատահար։ Այս մասին հայտնում են ՆԳՆ Փրկարար ծառայությունից։
Դեպքի վայր են մեկնել ՆԳՆ Ոստիկանության օպերատիվ խմբեր և Փրկարար ծառայության մարտական հաշվարկներ։
Պարզվել է, որ բախվել են «ՊԱԶ» և «Օպել Զաֆիրա» մակնիշի ավտոմեքենաները։ Պատահարի հետևանքով, նախնական տվյալներով, 5 մարդ մահացել է, իսկ 7-ը՝ ստացել տարբեր աստիճանի մարմնական վնասվածքներ։
Դեպքի հանգամանքները պարզվում են։
Լավ ապրելը նույնպես Հայաստանի Հանրապետությունում պետք է լինի սովորական, ինչի համար Կառավարությունը մեծ ներդրումներ է կատարում: Այս մասին ֆեյսբուքյան իր էջում գրել է վարչապետ Նիկոլ Փաշինյանը:
«Արմավիրի մարզի Մեծամոր համայնքի Երասխահուն բնակավայրի նորակառույց կրթահամալիրում հանդես եկա ելույթով»,- նշել է նա:
ՀՀ բուհերի հեռակա ուսուցման ընդունելության դիմում-հայտերի ընդունումը մեկնարկում է սեպտեմբերի 5-ին՝ ժամը 16:00-ին, ավարտվում սեպտեմբերի 25-ին՝ ժամը 18:00-ին:
Հեռակա ուսուցման ընդունելության համար պետք է dimord.am հարթակում լրացնել դիմում-հայտ:
Դիմում-հայտը լրացնելու համար անհրաժեշտ է՝
ա) ունենալ ԳԹԿ անձնական համար,
բ) ընդունելության յուրաքանչյուր քննությանը մասնակցելու համար ԳԹԿ հաշվեհամարին (900018003401) փոխանցած 1500 դրամի անդորրագիր: Ներբուհական քննություն հանձնողները սահմանված 1500 դրամ վճարը փոխանցում են տվյալ բուհի հաշվեհամարին:
ԳԹԿ անձնական համար տրամադրում է այն բուհը, որտեղ դիմորդը ցանկանում է ուսումը շարունակել: Իսկ եթե դիմորդը մասնակցել է 2026 թվականի բուհերի առկա ընդունելության քննություններին, ապա կարող է օգտագործել այդ ժամանակահատվածում ԳԹԿ-ի տված անձնական համարը:
Ընդունելության քննությունների հեռակա ուսուցման ընդունելության կանոնների 41-43-րդ կետերով սահմանված արտոնություններից օգտվող դիմորդները վարձավճարից ազատվում են:
Դիմորդները կարող են մրցույթին ներկայացնել միասնական և տվյալ բուհի համապատասխան մասնագիտության համար հանձնած ներբուհական քննությունների դրական գնահատական(ներ)ը կամ հանձնել նոր քննություններ: Այս դեպքում մրցույթում կօգտագործվեն ավելի բարձր գնահատականները:
Դիմորդը կարող է մասնակցել մեկ բուհի մինչև երեք մասնագիտությունների մրցույթին, որոնց համար սահմանված են ընդունելության միևնույն քննությունները։ Դիմորդն ընդունելության դիմում-հայտում իր ընտրությամբ և ցանկացած հաջորդականությամբ պետք է հայտագրի մասնագիտությունները և տվյալ մասնագիտության համար սահմանված առավելագույնը երկու ընդունելության քննությունները: Դիմում-հայտերի առաջին տողով նշված մասնագիտությունն ունի գերակայություն:
Բուհ ընդունված դիմորդների ցուցակները կհաստատվեն մինչև հոկտեմբերի 30-ը:
Պաշտպանության նախարար Սուրեն Պապիկյանը այսօր 3-րդ բանակային կորպուսի անձնակազմին ներկայացրել է նորանշանակ հրամանատարին՝ գնդապետ Սամվել Գրիգորյանին։ Այս մասին ֆեյսբուքյան իր էջում հայտնել է ՀՀ պաշտպանության նախարար Սուրեն Պապիկյանը։
Քուչակ-Ապարան ճանապարհահատվածում տեղի ունեցած վթարի հետևանքով մարզային բժշկական կենտրոններում հոսպիտալացվել է 10 տուժած: Այս մասին հայտնում են Առողջապահության նախարարությունից։
Նրանցից երկուսի առողջական վիճակն այս պահի դրությամբ գնահատվում է կայուն ծանր, իսկ մյուսներինը` միջին և թեթև ծանրության:
Բոլոր տուժածները ստանում են անհրաժեշտ բուժօգնություն:
ՆԳՆ ոստիկանության ծառայողները հանրապետության ողջ տարածքում շարունակում են իրականացնել հատուկ միջոցառումներ՝ հասարակական կարգի պահպանման և քաղաքացիների անվտանգության ապահովման նպատակով։
Տարբեր բնակավայրերի հավաքատեղիներում իրականացված շրջայցերի և ստուգողական միջոցառումների արդյունքում հայտնաբերվել և Համայնքային ոստիկանության տարածքային բաժիններ է ներկայացվել նախկինում դատապարտված և հանցավոր հակումներ ունեցող 61 անձ։
ՆԳՆ ոստիկանությունից հայտնում են, որ նման օպերատիվ-կանխարգելիչ միջոցառումները կրում են պարբերական բնույթ։