Հայաստանն անցնում է ընտրության փորձություն՝ Եվրասիական տնտեսական միության (ԵԱՏՄ) և Եվրոպական միության միջև։ Այս մասին հայտարարել է ՌԴ ԱԳ նախարար Սերգեյ Լավրովը Известия-ին տված հարցազրույցում։
«Այսօր հարևան Հայաստանը նույնպես անցնում է եվրոմիութենական այդ կաղապարի՝ «կամ-կամ, ընտրեք» փորձությունը։ Ռուսաստանի նախագահ Վլադիմիր Պուտինը մայիսի 9-ի ասուլիսում այս թեմայով շատ մանրամասն խոսել է․ Հայաստանը պետք է ինքնուրույն որոշի և ընտրություն կատարի՝ ցանկանում է մնալ ԵԱՏՄ-ում, թե՞ միանալ ԵՄ-ին։ Մենք կհարգենք հայ ժողովրդի ցանկացած ընտրություն, սակայն թող այդ ընտրությունը կատարվի։ Հայ ղեկավարները, փոխվարչապետ Մհեր Գրիգորյանն ասում է. «Մենք հանրաքվե կհայտարարենք միայն այն ժամանակ, երբ հարցը կտրուկ դրվի»: Իսկ դա ի՞նչ է նշանակում։ Պարոն Փաշինյանը նախընտրական քարոզարշավի ժամանակ, երբ բաց էր թողնում խաղաղության աղավնին, հայտարարել էր. «Ես չեմ կարող Հայաստանին ստիպել գնալ այս կամ այն ուղղությամբ, ես պարտավոր եմ առաջարկել այլընտրանք, իսկ որոշումը կկայացնի ժողովուրդը, բայց ես ցույց եմ տալիս այդ այլընտրանքները»։ Եթե դա այդպես է, ապա պետք է ցույց տալ այդ այլընտրանքները և հանրաքվե հայտարարել։ Իսկ եթե Երևանը ելնում է նրանից, որ, ինչպես վերջերս ասել է ղեկավարներից մեկը՝ «հանրաքվե կհայտարարենք միայն այն ժամանակ, երբ արդեն վերջնականապես պետք է պատասխան տալ Եվրոմիությանը», ապա դա այնքան էլ ժողովրդավարական չէ, ես կասեի։ Արդեն ընդունվել է օրենք՝ Հայաստանի՝ դեպի Եվրոպական միություն պաշտոնական շարժման մեկնարկի մասին։ Եթե նման օրենք կա, նշանակում է՝ դու արդեն ինքդ ես հարցը կտրուկ դրել, այդ դեպքում եկեք պատասխանատվություն կրենք մեր խոսքերի համար և դիմենք ժողովրդին»,- նշել է նա։
