Իսրայելի Բեն-Գուրիոն օդանավակայանի աշխատակիցները ամբողջությամբ վերսկսել են աշխատանքը՝ Իսրայելի օդանավակայանների վարչության (IAA) ղեկավարության և աշխատակիցների արհմիության միջև բանակցություններից հետո, որոնց նախորդել էր գործադուլը, հայտնում է The Times of Israel-ը։
IAA-ում հայտարարել են, որ նաև «զգալի ջանքեր» կգործադրվեն աշխատակիցների թիվը մեծացնելու համար, որպեսզի հնարավոր լինի հաղթահարել ներկայիս գործառնական ծանրաբեռնվածությունը։
Թռիչքներն ու վայրէջքները աստիճանաբար վերականգնվում են, սակայն օդանավակայանին ժամանակ կպահանջվի՝ բազմաժամյա ուշացումների և աշխատանքի խափանման հետևանքները վերացնելու համար։ Չվերթների մի մասը ամբողջությամբ չեղարկվել է։
Ուղևորներին խորհուրդ է տրվել հետևել իրենց ավիաընկերությունների տեղեկատվությանը։
«Մենք ցավում ենք և ներողություն ենք խնդրում ուղևորներից պատճառված անհարմարությունների համար»,- հայտարարել են Օդանավակայանների վարչությունից։