Սոմալեցի ծովահենները Եմենի ափերի մոտ նավթամթերք տեղափոխող տանկեր են գրավել, որը դարձել է արդեն վեցերորդ առևտրային նավը, որ նրանք ապրիլից գրավել են Ադենի ծոցի և Հնդկական օվկիանոսի արևմտյան հատվածի շրջանում, հայտնում է Associated Press-ը՝ հղում անելով Սոմալիի ծովային անվտանգության ծառայության ներկայացուցչին։
Ըստ նրա, հինգշաբթի օրը վեց զինված ծովահեններ գրավել են Էրիթրեայի դրոշի ներքո ընթացող M.T. Sibu 1 տանկերը՝ Եմենի Էլ-Մուկալլա քաղաքից մոտ 136 ծովային մղոն (252 կմ) դեպի արևելք։ Այնուհետև նավը ուղևորվել է դեպի Սոմալիի Պունտլենդ շրջանի ափերը։
Տանկերի վրա եղել են անձնակազմի 20 անդամներ՝ Հնդկաստանի 16 քաղաքացի, ինչպես նաև Սիրիայի, Սուդանի և Իրաքի քաղաքացիներ։ Եվս մեկ ծովայինի քաղաքացիությունը առայժմ չի հաստատվել։
Նավը կառավարում է ԱՄԷ-ում տեղակայված Qatrat Alnada Almasi Ship Management ընկերությունը։ Անցյալ տարի տանկերը հայտնվել էր ԱՄՆ ֆինանսների նախարարության պատժամիջոցների տակ․ Վաշինգտոնը պնդում էր, որ այն պատկանում է Իրանի, այսպես կոչված, «ստվերային նավատորմին», որն օգտագործվում է նավթամթերք տեղափոխելու համար՝ շրջանցելով ամերիկյան պատժամիջոցները։
Sibu 1-ի գրավումը տեղի է ունեցել ընդամենը երեք օր անց այն բանից հետո, երբ ծովահենները Սոմալիի ափերի մոտ գրավել էին Կամերունի դրոշի ներքո ընթացող Lutuf բեռնանավը։ Դրա վրա եղել է 10 մարդ, այդ թվում՝ Հնդկաստանի, Թուրքիայի, Վրաստանի քաղաքացիներ և երկու սերբ պահակներ։
Ծովահենության նոր ալիքի սկսվելուց ի վեր՝ ապրիլի 21-ից, արդեն գրավվել է վեց առևտրային նավ։ Միևնույն ժամանակ հարձակումները տեղի են ունենում Սոմալիի ափերից ավելի ու ավելի հեռու։ Միջազգային ծովային բյուրոն 2026 թվականի առաջին կեսին ամբողջ աշխարհում գրանցել է ծովահենության և նավերի վրա զինված հարձակումների 38 դեպք, ներառյալ հինգ գրավում։ Այդ ժամանակահատվածում ծովագնացներին պատանդ վերցնելու դեպքերի 94%-ը բաժին է ընկել սոմալեցի ծովահեններին։
Պունտլենդի իշխանությունները հայտարարել են, որ վերսկսված ծովահենական ակտիվությանը կարող են առնչություն ունենալ ուժեր, որոնք չեն վերահսկվում տարածաշրջանային իշխանությունների կողմից, սակայն չեն հստակեցրել, թե որ խմբավորումների կամ երկրների մասին է խոսքը։ Պունտլենդը նաև հայտնել է հարվածների մասին ձկնորսական նավերի և ափամերձ շրջանների օբյեկտների ուղղությամբ, որտեղ պահվում են գրավված նավերը, և պահանջել է բացատրություններ նրանցից, ովքեր հասցրել են այդ հարվածները։