ԵՐԵՎԱՆ, 11 սեպտեմբերի․ /ԱՌԿԱ/․ «Կուբ Ինվեսթ» (Cube Invest) ներդրումային ընկերությունը դարձել է Հայաստանում առաջին ներդրումային ընկերությունը, որը տեղական շուկայում թողարկել է պարտատոմսեր, հայտարարել է ընկերության գլխավոր տնօրեն Միքայել Մարգարյանը։
«Մենք սկսել ենք 5 մլրդ դրամ ընդհանուր ծավալով սեփական պարտատոմսերի տեղաբաշխումը։ Ակնկալում ենք, որ պարտատոմսերը կարող են ամբողջությամբ տեղաբաշխվել արդեն օրվա ընթացքում։ Իմ ունեցած տեղեկություններով՝ շատ քիչ ժամանակ է մնացել։ Ես սա գնահատում եմ որպես մեր գործընկերների, ինստիտուցիոնալ և մանրածախ ներդրողների կողմից վստահության ցուցանիշ, ինչպես նաև հաստատում այն բանի, որ մենք շարժվում ենք ճիշտ ուղղությամբ», – Երևանում «Ներդրումային հեռանկարներ 2026» ֆորումի ժամանակ ասել է Մարգարյանը։
Պարտատոմսերի շրջանառության ժամկետը 36 ամիս է, մեկ պարտատոմսի անվանական արժեքը՝ 100 հազար դրամ։
Մարգարյանի խոսքով՝ առաջին 6 ամիսների ընթացքում պարտատոմսերի տոկոսադրույքը կկազմի տարեկան 10.5%: «Հետագա արժեկտրոնային ժամանակահատվածներում տոկոսադրույքը կլինի լողացող և կհաշվարկվի ՀՀ Կենտրոնական բանկի վերաֆինանսավորման տոկոսադրույքի՝ գումարած 4 տոկոսային կետի հիման վրա», – ասել է Մարգարյանը։
Խոսելով թողարկման ծավալի մասին՝ Մարգարյանը նշել է, որ պարտատոմսեր թողարկելիս ընկերությունը հիմնվել է սեփական ֆինանսական ցուցանիշների և ֆինանսավորման կարիքների վրա։
«Կուբ Ինվեսթ»-ը նախատեսում է ներգրավված միջոցներն օգտագործել, մասնավորապես, իրացվելիությունը մեծացնելու, նոր պրոդուկտներ մշակելու և թողարկելու, ինչպես նաև տեխնիկական և տեղեկատվական տեխնոլոգիաների լուծումներ մշակելու համար։
«Այս քայլերով մենք ձգտում ենք ընդլայնել ներդրողների հնարավորությունները և մեր ներդրումն ունենալ ֆինանսական շուկայի զարգացման գործում», – ասել է Մարգարյանը։