Իրանը պատրաստվում է ԱՄՆ-ի կողմից նոր լայնածավալ հարձակումների, հաղորդում է Bloomberg-ը՝ հղում անելով իրանցի անանուն պաշտոնյայի։
Իրանի իշխանություններն ակնկալում են, որ նոր հարձակումները կարող են ավելի ուժեղ լինել, քան նախորդները։ Սակայն Թեհրանում վստահ են, որ Իրանի զինված ուժերն ի վիճակի են պատասխանել։ Գործակալության զրուցակիցը հայտարարել է, որ երկրում տնտեսական իրավիճակը շատ ծանր է, սակայն Իրանը հարմարվում է դրան։
Bloomberg-ի տեղեկություններով՝ Իրանում գնաճը մոտեցել է 90%-ի։ Վերջին երկու ամիսների ընթացքում իրանական ռիալը դոլարի նկատմամբ կորցրել է իր արժեքի մոտ մեկ քառորդը։ Գործակալությունը նաև պնդում է, որ սեպտեմբերին Իրանը հակամարտության սկզբից ի վեր առաջին անգամ նավթ չի բեռնել տանկերների վրա։ Միևնույն ժամանակ երկիրը շարունակում է մատակարարումները Չինաստան և արտահանման մի մասը վերաուղղել է ցամաքային սահմաններով։
Գործակալության հետ զրուցած փորձագետները տարբեր կերպ են գնահատել, թե որքանով է Իրանը վերահսկում Հորմուզի նեղուցը։ Սակայն Bloomberg-ի կողմից կազմված վիճակագրությունը ցույց է տալիս Պարսից ծոցի երկրներից նավթի մատակարարումների աստիճանական վերականգնում։ JPMorgan-ի տվյալներով՝ արտահանումն արդեն հասել է օրական 17,5 միլիոն բարելի՝ կազմելով նախապատերազմական մակարդակի 98%-ը։