Կիևի քաղաքապետ Վիտալի Կլիչկոն առաջարկել է այն բնակիչներին, որոնք ուկրաինական մայրաքաղաքից դուրս ընկերներ կամ հարազատներ ունեն, դիտարկել քաղաքից ժամանակավորապես հեռանալու հնարավորությունը․ այս մասին նա հայտնել է AFP-ին տված հարցազրույցում։
«Ամեն օր նոր հաղորդագրություններ են ստացվում ավերված շենքերի, վիրավորների և զոհերի մասին. մեր քաղաքի հրետակոծություններն ուժգնանում են։ Այսօր խոսքը գոյատևման մասին է»,- հայտարարել է քաղաքապետը։
Նա ընդգծել է, որ երբեք կոչ չի անի քաղաքի ամբողջական տարհանման։
«Դա է Պուտինի նպատակը։ Նրա համար լավագույն սցենարն այն է, որ մենք բոլորս հեռանանք և նրան հանձնենք մեր դատարկ քաղաքներն ու ամբողջ երկիրը»,- ասել է Կլիչկոն։
Կիևի քաղաքապետը նաև հայտնել է, որ ձմռանն ընդառաջ Կիևը պատրաստում է ջեռուցման պահուստային համակարգեր և կուտակում է վառելիքի, սննդի ու խմելու ջրի պաշարներ։ Այնուամենայնիվ, նույնիսկ պատշաճ պատրաստվածությունը չի բացառում վատ սցենարը, եթե հակաօդային պաշտպանությունը չկարողանա հետ մղել հարձակումները, հավելել է նա։