ԱՄՆ-ի նախագահի վարչակազմի պաշտոնյաները մտահոգված են, որ Իրանի հետ հակամարտությունը կարող է վերածվել սառեցված դիմակայության, հաղորդում է Axios-ը՝ հղում անելով ԱՄՆ-ի պաշտոնյաներին։
«Սառեցված հակամարտությունը (ԱՄՆ-ի նախագահ Դոնալդ Թրամփի համար – խմբ.) քաղաքական և տնտեսական տեսանկյունից ամենավատ տարբերակն է»,- ասել է աղբյուրը լրատվամիջոցին։
Նշվում է, որ երկու կողմերը կարող են հայտնվել այնպիսի իրավիճակում, երբ ռազմական գործողությունները չեն վերսկսվի, բայց նաև խաղաղության համաձայնագիր չի կնքվի։ Սա կարող է հանգեցնել նրան, որ Հորմուզի նեղուցը մնա փակ, իսկ ԱՄՆ-ի ռազմածովային շրջափակումը չվերացվի։ Երկու կողմերն էլ կսպասեն, որ մյուսը թուլություն ցուցաբերի։
Լրատվամիջոցի աղբյուրների համաձայն՝ Թրամփը տատանվում է ռմբակոծությունները վերսկսելու և պատժամիջոցները խստացնելու միջև։ Axios-ի աղբյուրի խոսքով՝ ամերիկացի առաջնորդը «հիասթափված ռեալիստի» տրամադրության մեջ է, քանի որ նա չի ցանկանում ուժ կիրառել, բայց նաև չի կարողանում նահանջել։