Իսրայելական լրատվամիջոցները հայտնել են ենթադրյալ գաղտնի գործողության մասին, որի շրջանակում իսրայելական «Մոսադ» հետախուզական ծառայությունը Կենտրոնական հետախուզական վարչության հետ համատեղ աջակցություն է ցուցաբերել քրդական զինված կազմավորումներին՝ նպատակ ունենալով ուժեղացնել ճնշումը Իրանի վրա և նպաստել հնարավոր հակակառավարական ելույթներին։
Channel 12 հեռուստաալիքի և Ynet պարբերականի տվյալներով, որոնց հրապարակումները հայտնվել են «Մոսադի» ղեկավար Դավիթ Բարնեայի պաշտոնից հեռանալուց անմիջապես հետո, քրդական ջոկատները ֆինանսական օգնություն, փոխադրամիջոցներ, ինչպես նաև տարբեր տեսակի սպառազինություն են ստացել։
Հաղորդվում է, որ քրդական կազմավորումներին փոխանցվել են հրաձգային զենքեր, հակատանկային նռնականետեր, նռնակներ և ականանետային զինամթերք։ Ըստ այդ հաղորդումների՝ սպառազինության մի մասը նախկինում զավթվել էր պաղեստինյան ՀԱՄԱՍ շարժման և լիբանանյան «Հըզբոլլահ» խմբավորման հետ հակամարտությունների ընթացքում, իսկ զենքի ու զինամթերքի տեղափոխումը համակարգել է «Մոսադը»։
Դեռևս մարտի վերջին լրատվամիջոցներում լուրեր էին հայտնվել ամերիկա-իսրայելական ենթադրյալ ծրագրի մասին, ըստ որի՝ նախատեսվում էր քրդական զինված կազմավորումներին ներգրավել Թեհրանի դեմ արշավի վաղ փուլում։ Այս տվյալներով՝ ենթադրվում էր, որ քրդական ուժերի գործողությունները կարող էին նպաստել ներքին ապստամբության առաջացմանը և իրանական իշխանությունների դիրքերի թուլացմանը։
Սակայն, ինչպես պնդում են իսրայելական լրատվամիջոցները, այդ նախաձեռնության իրականացումը բախվել է մի շարք խոչընդոտների։ Դրանց թվում նշվում են մամուլում տեղեկատվության արտահոսքերը, միջազգային խաղացողների, դրանց թվում՝ Թուրքիայի նախագահ Ռեջեփ Թայիփ Էրդողանի գործադրած դիվանագիտական ճնշումը, ինչպես նաև նման սցենարի նկատմամբ բուն քրդական խմբավորումների զգուշավոր վերաբերմունքը։
Արդյունքում, ըստ հրապարակումների տվյալների, ԱՄՆ նախագահ Դոնալդ Թրամփը որոշում է ընդունել հրաժարվել ծրագրի իրագործումից։ Ավելի վաղ Թրամփը նույնպես հայտարարել էր, որ Միացյալ Նահանգները փորձել է քրդական կառույցների միջոցով զենք փոխանցել իրանական իշխանությունների հակառակորդներին, սակայն միևնույն ժամանակ ակնարկել էր, որ սպառազինության մի մասը կարող էր մնացած լինել հենց քրդական անջատողական խմբավորումների մոտ։
ԱՄՆ-ի, Իսրայելի կամ քրդական կազմակերպությունների կողմից այս ենթադրյալ գործողության մասին տեղեկության պաշտոնական հաստատում տվյալ պահին չի ստացվել։