Ռուսաստանի Կրասնոդարի երկրամասի Տեմրյուկի շրջանում անօդաչու թռչող սարքերի հարձակման և դրանց բեկորների ընկնելու հետևանքով հրդեհ է բռնկվել ծովային տերմինալի տարածքում։ Այս մասին Telegram-ում հայտնել է տարածաշրջանի նահանգապետ Վենիամին Կոնդրատևը։
Նախնական տվյալներով՝ միջադեպի հետևանքով զոհվել է մեկ մարդ, ևս երեքը ստացել են վնասվածքներ։ Տուժածներին ցուցաբերվում է անհրաժեշտ բժշկական օգնություն։
«Ցավոք, մեկ մարդ զոհվել է։ Իմ խորին ցավակցությունն եմ հայտնում զոհվածի ընտանիքին», — հայտարարել է Կոնդրատևը։
Հրդեհի մարման աշխատանքներում ներգրավված են արտակարգ ծառայությունների ուժերը։ Իշխանությունների տեղեկություններով՝ տեղում աշխատում է 96 մարդ և ավելի քան 30 միավոր տեխնիկա, այդ թվում՝ Ռուսաստանի ԱԻՆ ստորաբաժանումները։
Փրկարարական և օպերատիվ ծառայությունները շարունակում են աշխատանքը տերմինալի տարածքում. իրականացվում են հրդեհաշիջման և պատահարի հետևանքների գնահատման աշխատանքներ։