Միջերկրական ծովի ափին գտնվող եգիպտական Դումյաթ նավահանգստում անօդաչու թռչող սարքը հարձակվել է հեղուկացված բնական գազով ևս մեկ լցանավի վրա, հայտնում է Reuters-ը՝ վկայակոչելով ծովային անվտանգության ոլորտում մասնագիտացած բրիտանական Ambrey ընկերությանը։
Ըստ Ambrey-ի տեղեկությունների՝ նոր թիրախ է դարձել Բերմուդյան կղզիների դրոշի ներքո նավարկող հունական հեղուկացված բնական գազով լցանավը։ Հարձակման պահին նավը եգիպտական պետական Egyptian Gas Holding Company ընկերության տերմինալի կառանամատույցում էր։ Նախնական տվյալներով՝ գազ տեղափոխող նավին հարվածել է առնվազն մեկ անօդաչու, ինչից հետո նավի վրա հրդեհ է բռնկվել։
Դրանից քիչ առաջ Ambrey-ն հայտնել էր մեկ այլ նավի՝ Մարշալյան կղզիների դրոշի ներքո նավարկող ամերիկյան Energos Winter լողացող հեղուկացված բնական գազով տերմինալի վրա հարձակման մասին։ Reuters-ի աղբյուրների տվյալներով՝ անօդաչուի հարվածից հետո նավի վրա հրդեհ էր առաջացել, որն այնուհետև տարածվել էր մոտակայքում գտնվող հեղուկացված գազ տեղափոխող նավի վրա։
Երկու նավերի անձնակազմերը տարհանվել են։ Ըստ տեղեկությունների՝ հարձակումների հետևանքով ոչ ոք չի տուժել։