ՀՀ Սահմանադրության 151-րդ հոդվածի համաձայն՝ Կառավարության կազմավորումից հետո՝ քսանօրյա ժամկետում, վարչապետն Ազգային ժողով է ներկայացնում Կառավարության ծրագիրը: ԱԺ-ի կողմից հավանության արժանանալուց հետո Կառավարությունը եռամսյա ժամկետում կհաստատի գործունեության միջոցառումների հնգամյա ծրագիրը:
BanksNews.am-ն ուսումնասիրել է փաստաթուղթը և առանձնացրել տնտեսական մրցունակության, արտադրողականության բարձրացման ու գիտելիքահենք տնտեսության ձևավորմանն ուղղված առանցքային դրույթներն ու նախատեսվող բարեփոխումները:
Բիզնես միջավայր և թվայնացում
Կառավարությունը նպատակադրվել է Համաշխարհային բանկի Business Ready (B-READY) գնահատման մեթոդաբանությամբ զբաղեցնել առաջատար դիրքեր՝ գերազանցելով երկրների առնվազն 70%-ին:
- Միկրոբիզնեսի արտոնություններ. Միկրոձեռնարկատիրության սուբյեկտ համարվելու տարեկան շրջանառության շեմն առնվազն կրկնապատկվելու է: Միաժամանակ, հարկային օրենսդրության պարբերական խախտումների դեպքում տնտեսավարողները կզրկվեն այս ռեժիմից:
- Ծառայությունների և մաքսային համակարգի թվայնացում. Տնտեսավարողներին մատուցվող պետական ծառայությունները, ինչպես նաև մաքսային հսկողությունն ու սպասարկումը (միասնական հաշիվ, ԱԲ գործիքներ, թույլտվությունների հարթակներ) ամբողջությամբ կթվայնացվեն:
- Փոքր բիզնեսի պաշտպանություն. Կամրապնդվեն խոշոր և փոքր տնտեսավարողների միջև բանակցային դիրքերի հավասարակշռման մեխանիզմները՝ առևտրային հարաբերություններում փոքր մատակարարներին պաշտպանելու համար:
- Միջազգային հարթակներ. Մասնավոր հատվածի հետ համատեղ կիրականացվի «Համաշխարհային առևտրի կենտրոն Հայաստան» (World Trade Center) նախագիծը:
Արտադրողականության աճ. ՓՄՁ, Գյուղատնտեսություն և Արդյունաբերություն
- ՓՄՁ մասնաբաժին. Բարեփոխումների արդյունքում նախատեսվում է ՀՆԱ-ում ՓՄՁ-ների մասնաբաժինը 2024 թվականի 34,3%-ից հասցնել մինչև 40%-ի:
- Ինտենսիվ գյուղատնտեսություն.
- Տարեկան կհիմնվի 1500 հա ինտենսիվ այգի, 150 հա ժամանակակից ջերմատուն, իսկ 8000 հա-ում կներդրվեն ջրախնայող տեխնոլոգիաներ:
- Ձեռք կբերվի 3000 միավոր գյուղտեխնիկա և 2000 միավոր ագրոպարենային սարքավորում:
- Կկառուցվի 50 խելացի անասնաշենք (կամ 2500 գլխի համար):
- Տոհմային կենդանիների տեսակարար կշիռը կեռապատկվի (2,5%-ից հասնելով 7,5%-ի), իսկ կովերի միջին կաթնատվությունը 2500 կգ-ից կհասնի 3600 կգ-ի:
Արդյունաբերության վերափոխում.
- Մշակող արդյունաբերությունը կարդիականացվի առնվազն 15 հազար միավոր նորագույն մեքենասարքավորումներով:
- Կստեղծվի արդյունաբերական ձեռնարկությունների միասնական թվայնացված ռեեստր:
- Կձևավորվեն կենսագազի և կանաչ ջրածնի առնվազն մեկական արտադրական ենթակառուցվածքներ:
-
Ընդերքօգտագործում. Կներդրվեն EITI և ESG ստանդարտները, կստեղծվի Երկրաբանական ծառայություն և միասնական թվային շտեմարան, իսկ ընդերքօգտագործման իրավունքների տրամադրման գործընթացն ամբողջությամբ կթվայնացվի:
Որակի ստանդարտներ և Բիզնեսի թվայնացում
- Ստանդարտներ. Արտադրանքի անվտանգության տեխնիկական կանոնակարգերը կներդաշնակեցվեն ԵՄ և ԵԱՏՄ կարգավորումներին: Կներդրվի ներմուծվող թունաքիմիկատների ու պարարտանյութերի որակի վերահսկման թվային համակարգ:
- ԱԻ և Ավտոմատացում. Կներդրվի ֆինանսական խթանների համակարգ՝ ձեռնարկությունների կողմից ամպային տեխնոլոգիաների, կիբեռանվտանգության և արհեստական բանականության (ԱԲ) գործիքների ներդրումը աջակցելու համար:
- Կորպորատիվ կառավարում. Կմշակվի միասնական գնահատման մեթոդաբանություն. բարձր կորպորատիվ հասունություն ունեցող ընկերությունները կստանան առավելություններ պետական աջակցության ծրագրերում:
Գիտելիքահենք տնտեսություն և Գիտության առևտրայնացում
2026–2031 թվականներին նախատեսվում է գիտության ֆինանսավորումը հասցնել ՀՆԱ-ի 1%–ի:
- Մտավոր սեփականություն. Հայտերի ներկայացման, փորձաքննության և գրանցման գործընթացներն ամբողջությամբ կթվայնացվեն: Կգործարկվեն հայաստանյան ստեղծագործությունների միջազգային արտոնագրման (PCT) խթանման ծրագրեր:
- Գիտություն-Բիզնես կապ.
-
ԱԲ և կիսահաղորդիչների ոլորտներում կիրականացվի առնվազն 2 համալիր ծրագիր և 10 խոշոր հետազոտական նախագիծ:
-
Պետական պատվերով կֆինանսավորվի առնվազն 80 թիրախային հետազոտություն:
-
Առնվազն 3 առաջատար բուհերում կստեղծվեն տեխնոլոգիաների փոխանցման գրասենյակներ:
-
- Ստարտափներ և «Ակադեմիական քաղաք». «Ակադեմիական քաղաք» ծրագրի առաջին փուլում կստեղծվի տեխնոլոգիական համալսարանի ստարտափների ինկուբատոր. պետություն-բուհ-մասնավոր համատեղ ներդրումներով կֆինանսավորվի համալսարանական առնվազն 30 ստարտափ: