Հայաստանի շուրջ 600 հազար հպարտ քաղաքացիներ իրենց ձայները տվել են ընդդիմությանը։ Միևնույն ժամանակ, նրանցից 60 հազարի ձայների վրա ձեր իշխանությունը պարզապես թքած ունի։ Այս մասին օգոստոսի 21-ին Ազգային ժողովի նիստում, ֆինանսավարկային և բյուջետային հարցերի մշտական խորհրդարանական հանձնաժողովի նախագահի ընտրության հարցի քննարկման ժամանակ, հայտնել է «Ուժեղ Հայաստան» ընդդիմադիր խմբակցության պատգամավոր Մարիաննա Ղահրամանյանը։
«Չէ՞ որ այս խորհրդարանում բացակայում է չորրորդ խմբակցությունը՝ «Բարգավաճ Հայաստանը»», – պարզաբանել է Ղահրամանյանը։
Նրա խոսքով՝ իշխանության աղբյուրը այն ժողովուրդն է, որին Հայաստանի գործող կառավարության ղեկավարը վերջին բառերով պիտակավորում և վիրավորում է։
«Որին ձեր իշխանության ղեկավարն ասում է․ «Ինչո՞ւ ես ողջ, ինչո՞ւչես զոհվել», «Գողացող անասուններ», «Սրիկաներ», «Կորե՛ք այստեղից» և այլն։ Մնացած բնորոշումները ես չեմ մեջբերի, որովհետև դրանք պարզապես ամոթ է կրկնել», – հիշեցրել է պատգամավորը։
Նա նշել է, որ երկրում իշխանության աղբյուրը ժողովուրդն է, որին Հայաստանի վարչապետ Նիկոլ Փաշինյանը կաշառակեր է անվանել՝ պնդելով, թե ընդդիմադիր հայացքներ ունեցող ժողովուրդը հենց այնպես չէր գնա և ընդդիմության օգտին չէր քվեարկի։