Վատիկանը ծրագրում է Հռոմի ծայրամասում կառուցել մոտ 100 մլն եվրո արժողությամբ խոշոր ագրովոլտային էլեկտրակայան, որը Սուրբ Աթոռին թույլ կտա ամբողջությամբ անցնել վերականգնվող էներգիայի, հաղորդում է Reuters-ը՝ հղում անելով նախագծին ծանոթ աղբյուրներին։
Կայանի հզորությունը կկազմի 80–90 ՄՎտ, ինչն այն կդարձնի այդ տիպի խոշորագույն կայանքներից մեկը Իտալիայում։ Արևային վահանակները կտեղադրվեն գետնից մի քանի մետր բարձրության վրա, որպեսզի դրանց տակ հնարավոր լինի գյուղատնտեսական մշակաբույսեր աճեցնել։ Վահանակների ստվերը կօգնի նվազեցնել ջրի գոլորշիացումը և պաշտպանել բույսերը ծայրահեղ եղանակային պայմաններից։
Կայանը նախատեսվում է տեղակայել Վատիկանին պատկանող Սանտա Մարիա դի Գալերիա տարածքում՝ Հռոմի հյուսիս-արևմտյան ծայրամասում գտնվող մոտ 450 հեկտար մակերեսով հողամասում։ Մոտ 200 հեկտարը, այսինքն՝ տարածքի գրեթե կեսը, կարող են զբաղեցնել շրջվող արևային վահանակները։
Նախագիծը նախատեսվում է իրականացնել 18–24 ամսում, ներառյալ անհրաժեշտ թույլտվությունների ստացումը։ Էլեկտրաէներգիան կօգտագործվի Վատիկանի ռադիոյի հաղորդիչ կենտրոնի, ինչպես նաև Սուրբ Աթոռի հետ կապված այլ օբյեկտների աշխատանքի համար, այդ թվում՝ հնարավոր է՝ Հռոմի Bambino Gesù հիվանդանոցի։ Էլեկտրաէներգիայի ավելցուկը նախատեսվում է փոխանցել Իտալիային։
Նախագիծը եղել է Ֆրանցիսկոս պապի առաջնահերթություններից մեկը և ստացել է նրա իրավահաջորդի՝ Հռոմի պապ Լևոն XIV-ի աջակցությունը։ Ավելի վաղ Իտալիան և Վատիկանը համաձայնագիր էին կնքել, որը նախատեսում է նախագծի համար հատուկ կարգավիճակ, այդ թվում՝ որոշ հարկերից և պետական տուրքերից ազատում։