BBC-ն տեղեկացել է, որ Սասեքսի դուքսն ու դքսուհին և նրանց երեխաները՝ Արչին ու Լիլիբեթը վերադարձել են Մեծ Բրիտանիա։ Ենթադրվում է, որ նրանք Կալիֆոռնիայից ժամանել են մասնավոր չվերթով։
Արքայազն Հարրին և Մեգանը չեն վերադառնա պաշտոնական պարտականությունների կատարման, այլ Մեծ Բրիտանիայում կապրեն որպես մասնավոր անձինք։ Նրանք հրաժարվեցին իրենց թագավորական պարտականություններից 2020 թվականի գարնանը և լքեցին Մեծ Բրիտանիան՝ բնակություն հաստատելով Կալիֆոռնիայում։
Ըստ տեղեկությունների՝ ընտանիքը բնակություն կհաստատի Լոնդոնից դուրս գտնվող մասնավոր կալվածքում՝ գեղատեսիլ Քոթսուոլդսի շրջանում։ Երեխաները՝ Արչին և Լիլիբեթը, արդեն ընդունվել են դպրոց, ուսումնական տարին կսկսվի հաջորդ շաբաթ։
Անցյալ տարի արքայազն Հարրին պարտվեց դատական գործը՝ Մեծ Բրիտանիայում գտնվելու ընթացքում իրեն և ընտանիքին հասանելիք անվտանգության մակարդակի վերաբերյալ։
Առայժմ պարզ չէ, թե ինչ միջոցներ են ձեռնարկվելու հայրենիքում նրանց անվտանգությունն ապահովելու հարցում, և ովքեր են վճարելու դրա համար: Սասեքսի ամուսինների պլանավորված վերադարձի մասին հայտարարությունից հետո Մեծ Բրիտանիայի ՆԳՆ ներկայացուցիչը հայտարարել է, որ թագավորական ընտանիքի անդամների անվտանգության մասին որոշումներն ընդունում է թագավորական ընտանիքի և հասարակական գործիչների պաշտպանության հարցերով գործադիր կոմիտեն (RAVEC):