2026թ․ օգոստոսի 27-ին Լոռու մարզի Փամբակ համայնքի ավագանին արտահերթ նիստում քննարկել և նախնական համաձայնություն է տվել համայնքի վարչական սահմաններում գտնվող Հանքաձորի հանքային դաշտի տարածքում արդյունաբերական նշանակության հանքայնացում հայտնաբերելու նպատակով երկրաբանական ուսումնասիրություն իրականացնելու առաջարկին։
Հարցը ներկայացրել է Փամբակ համայնքի ղեկավար Սուրեն Կոստանդյանը։ Ըստ նիստի արձանագրության՝ քննարկման հիմքում եղել է «Բարիբա» ՍՊԸ-ի՝ 2026թ․ հուլիսի 7-ի գրությունը։
«Հանքաձորի հանքային դաշտի տարածքում արդյունաբերական նշանակության հանքայնացում հայտնաբերելու նպատակով երկրաբանական ուսումնասիրություն կատարելուն նախնական համաձայնություն տրամադրելու մասին» որոշման նախագծի ներկայացման ժամանակ համայնքի ղեկավարը նշել է, որ ուսումնասիրության հարցի վերաբերյալ հաշվի են առնվել նաև 2026թ․ օգոստոսի 11-ին Փամբակ համայնքի Եղեգնուտ, Դեբեդ և Վահագնի բնակավայրերում անցկացված հանրային լսումների արդյունքների վերաբերյալ կազմված արձանագրությունները և տեսաձայնագրությունները։
Նախագծի քվեարկության արդյունքում՝ 10 ավագանի կողմ է քվեարկել, դեմ ձայն չի եղել, 2 ավագանի ձեռնպահ է մնացել։
Սեպտեմբեր 02, 2026 at 17:01