Արգենտինայի ԱԳՆ-ն մտադիր է դատական հայց ներկայացնել Navitas Petroleum և Eco (Atlantic) Oil & Gas ընկերությունների դեմ՝ առանց երկրի իշխանությունների համաձայնեցման վիճելի Մալվինյան (Ֆոլքլենդյան) կղզիների շրջանում նավթահանքերի շահագործման պատճառով։ Սեպտեմբերի 7-ին այս մասին հայտնել են նախագահ Հավիեր Միլեյի աշխատակազմի մամուլի ծառայությունից։
«Նախագահի աշխատակազմը հայտնում է, որ այսօր արտաքին գործերի, միջազգային առևտրի և պաշտամունքի նախարար Պաբլո Կիրնոն քրեական հայց կներկայացնի Navitas Petroleum Development & Production Ltd., Navitas Petroleum Atlantic United, Navitas Petroleum LP, JHI Associates Inc. և Eco (Atlantic) Oil & Gas Ltd ընկերությունների դեմ», — ասված է կայքում հրապարակված մամուլի ծառայության հաղորդագրության մեջ։
Գերատեսչությունում գտնում են, որ ընկերությունները կարող էին Բրիտանիայի իշխանություններից (որոնց Բուենոս Այրեսը ոչ լեգիտիմ է համարում կղզիների հարցում) Հյուսիսային Մալվինյան (Ֆոլքլենդյան) ավազանում ածխաջրածինների հետախուզման և արդյունահանման թույլտվություններ ստացած լինել, ինչը, գերատեսչության գնահատմամբ, խախտում է Արգենտինայի օրենսդրությունը։ Հայցը նախատեսվում է ներկայացնել ոչ միայն բուն ընկերությունների, այլև դրանց բաժնետերերի դեմ։
Միլեյը սեպտեմբերի 4-ին հայտարարել էր պատժամիջոցներ սահմանելու և պատիժները խստացնելու մասին այն օտարերկրյա ընկերությունների համար, որոնք գործունեություն են ծավալում Մալվինյան (Ֆոլքլենդյան) կղզիներում՝ առանց Բուենոս Այրեսի թույլտվության։ Նախագահի խոսքով՝ սահմանափակումները կվերաբերեն ոչ միայն կղզիներում աշխատող կազմակերպություններին, այլև դրանց բաժնետերերին, տնօրեններին ու մատակարարներին։ Այն ընկերություններին, որոնք վիճելի տարածքում գործունեություն են ծավալում առանց արգենտինական իշխանությունների համաձայնության, կարող է ամբողջությամբ արգելվել աշխատանքը երկրում։
Արգենտինայի ղեկավարի մամուլի ծառայությունը սեպտեմբերի 5-ին հայտնել էր, որ Արգենտինայի ԱԳՆ-ն՝ երկրի նախագահ Հավիեր Միլեյի հանձնարարականով, սահմանափակիչ միջոցառումների ընթացակարգ է նախաձեռնել 45 ֆիզիկական և իրավաբանական անձանց նկատմամբ, որոնք կասկածվում են Մալվինյան (Ֆոլքլենդյան) կղզիներում ածխաջրածինների արդյունահանման գործունեության մեջ։ Արգենտինայի իշխանությունները պատժամիջոցներն անվանել են արդարության ակտ այն մարդկանց հանդեպ, որոնք պայքարել ու իրենց կյանքն են տվել հայրենիքի համար։