22-ամյա տղամարդը խոստովանել է իր մեղքը Վաշինգտոնի բնակչից ավելի քան 245 միլիոն դոլար արժողությամբ բիթքոինների գողությանը մասնակցելու համար, որը, ինչպես հայտնում է Associated Press-ը, ԱՄՆ պատմության մեջ ամենախոշոր կրիպտոարժութային գողություններից մեկն է։
Մելոուն Լեմը, որը ութերորդ դասարանից հետո թողել էր դպրոցը և Սինգապուրից տեղափոխվել ԱՄՆ, իրեն մեղավոր է ճանաչել հանցավոր դավադրության գործով։ Նրան սպառնում է մինչև 20 տարվա ազատազրկում։ Դատարանը դեռ չի նշանակել դատավճռի հրապարակման օրը։
Դատախազության տվյալներով՝ Լեմը երիտասարդների ցանցի կազմակերպիչներից մեկն էր, որոնք 2023 թվականից ի վեր զբաղվել են կրիպտոարժույթներին առնչվող խարդախություններով։ Ընդհանուր առմամբ գործով անցնում է 18 մեղադրյալ, որոնցից 11-ն արդեն խոստովանել են իրենց մեղքը։
2024 թվականի օգոստոսին Լեմն ու նրա հանցակիցները սոցիալական ինժեներիայի մեթոդների միջոցով Վաշինգտոնի բնակչից հափշտակել են ավելի քան 245 միլիոն դոլար արժողությամբ բիթքոիններ։ Երկու հանցակից ներկայացել են որպես Google-ի և Gemini կրիպտոարժութային բորսայի աշխատակիցներ և համոզել տղամարդուն տրամադրել իր Google Drive-ի հասանելիությունը և բացահայտել անվտանգության կոդերը։ Դրանից հետո Լեմը կարողացել է դուրս բերել ավելի քան 4100 բիթքոին։
Հափշտակված կրիպտոարժույթը հանցակիցները լվացել են և վերածել կանխիկի։ Լեմը գումարի մի մասը ծախսել է սպորտային ավտոմեքենաների հավաքածուի, Մայամիում շքեղ առանձնատների վարձակալության և գիշերային ակումբներ այցելելու վրա։ Միայն Լոս Անջելեսի ակումբներից մեկում մեկ երեկոյի ընթացքում նա 569 հազար դոլար է ծախսել։
Ընդհանուր առմամբ, ՀԴԲ-ի տվյալներով, Լեմը ձեռք է բերել ավելի քան 30 ավտոմեքենա, դրանց թվում՝ անհատական փոփոխություններով Porsche, Lamborghini և Ferrari, ինչպես նաև մոտ 2 միլիոն դոլար արժողությամբ ժամացույցներ։
Շռայլ կյանքը շարունակվել է մոտ մեկ ամիս, որից հետո ՀԴԲ գործակալները Լեմին ձերբակալել են Մայամիում։ Մեղադրական եզրակացության մեջ նշվում է, որ ձերբակալությունից կարճ ժամանակ առաջ իրավապահ մարմինների աշխատակիցներից մեկը, որը տվյալ պահին ծառայության մեջ չէր, Լեմին նախազգուշացրել էր սպասվող ձերբակալության մասին։
Դատական նիստի ընթացքում դատավոր Քոլին Քոլար-Քոթելլին հարցրել է Լեմին՝ հիշո՞ւմ է արդյոք, թե ավտոմեքենաներից որոնք է անձամբ գնել։ «Ինձ մի փոքր ժամանակ կպահանջվի»,- պատասխանել է նա։