Բնապահպանության և ընդերքի տեսչական մարմինն ուսումնասիրել է չգործող պոչամբարների ազդեցությունը շրջակա միջավայրի վրա։ Արդյունքները ներկայացվում են Հանրային հեռուստաընկերության ռեպորտաժում։
Ըստ Բնապահպանության և ընդերքի տեսչական մարմնի ղեկավար Հովհաննես Մարտիրոսյանի՝ «Խիստ վտանգավոր կամ աղետալի վիճակ չունենք»։
Հայաստանում կա 22 պոչամբար, որոնք միասին զբաղեցնում են 1176 հեկտար տարածք։ 22 պոչամբարից 12-ը գտնվում են Սյունիքում, 7-ը՝ Լոռիում, 1-ական էլ Արագածոտնի, Արարատի և Գեղարքունիքի մարզերում։ 22 պոչամբարից գործում են 7-ը, ռեկուլտիվացված են 6-ը, իսկ 9-ը պետք է ռեկուլտիվացվեն։
Բնապահպանության և ընդերքի տեսչական մարմնի ղեկավար Հովհաննես Մարտիրոսյանը պարզաբանում է՝ ինչու են ստուգումներն իրականացվել 2025 թվականին․ «Որովհետև առնվազն 2025 թվականին տեսչական մարմինն ունի այն մասնագիտական ներուժը և տեխնիկական հագեցվածությունը, ինչը թույլ է տալիս այդ ուսումնասիրությունն իրականացնել առավել ճշգրիտ և ստուգաչափած տվյալների հիման վրա։ Արձանագրել ենք որոշակի խնդիրներ, որոնք կարող են հետագայում առաջացնել ինչ-որ իրավիճակներ։ Աշխատանքային խմբի առաջ խնդիր է դրված եղել վեր հանել այդ խնդիրները և տալ առաջարկություններ՝ ինչ միջոցառումներ է պետք իրականացնել հետագայում հնարավոր առաջացող ռիսկերը կանխարգելելու համար»։
Աշխատանքային խմբում ներգրավված են Ակադեմիկոս Ի․Վ․Եղիազարովի անվան ջրային հիմնահարցերի և հիդրոտեխնիկայի ինստիտուտը և Երկրաբանների միությունը։
«Ուսումնասիրում ենք հատուկ ջրամեկուսիչ նյութ ստեղծելու ուղղությամբ, որով կպատենք պոչամբարի ամբողջ այն մակերեսը և կթողնենք այնքան ֆիլտրացիոն ելքեր, որ անհրաժեշտ է պոչամբարի հետագա կայուն գոյատևման համար։ Նյութն իրենից ներկայացնում է բնական պոլիմերահանքային ծագում ունեցող նյութ, որը մեծացնում է պաշտպանական շերտը, այսինքն, փոքրացնում է ֆիլտրացիայի գործակիցը։ Նոյեմբերից սկսած մենք անում ենք կոնկրետ պոչերի վրա՝ ուսումնասիրելով պոչի ագրեսիվության ազդեցությունն այդ նյութով ստեղծված տեխնոլոգիաների վրա։ Բացարձակապես ազդեցություն չունի այս պահի դրությամբ, և բոլոր փորձարկման արդյունքները, որոնք հրատարակվել են բարձր տեխնոլոգիաների տեղեկագրում, ցույց են տալիս, որ մենք կարող ենք անցնել հաջորդ փուլին», – ասաց Ակադեմիկոս Ի․Վ․Եղիազարովի անվան ջրային հիմնահարցերի և հիդրոտեխնիկայի ինստիտուտի գիտխորհրդի նախագահ Հովհաննես Թոքմաջյանը։ Հաջորդ փուլը նյութը բնական միջավայրում փորձարկելն է։
«Առաջարկելու ենք մեր գործընկերներին՝ փորձնական ընտրենք որևէ տարածք և փորձնական այդ նյութն օգտագործենք, որոշ ժամանակ հետո կհասկանանք՝ ինչ արդյունքներ ենք ստացել։ Այդ նոր մեթոդը, իմ կարծիքով, կա հնարավորություն պոչերի ռեկուլտիվացման մեջ սահմանել որպես նոր ստանդարտ, որը պարտադիր կլինի բոլոր պոչերի ռեկուլտիվացման համար», – նշեց Հովհաննես Մարտիրոսյանը։
Ապրիլ 07, 2026 at 13:20