Տարեց լինելը միայն անձնագրում նշված տարիքո՞վ է որոշվում, թե՞ մարդը կարող է իրեն տարեց զգալ շատ ավելի վաղ։ Հոկտեմբերի 1-ին՝ Տարեցների միջազգային օրը, Երևանի փողոցներում քաղաքացիներից հետաքրքրվել ենք՝ ինչպես են իրենք պատկերացնում տարեցությունը, որոնք են այդ տարիքի մարդկանց առջև ծառացած հիմնական խնդիրներն ու որքանով է ընտանիքը պատասխանատու նրանց նկատմամբ վերաբերմունքի համար։
Քաղաքացիների պատասխանները տարբեր էին։ Ոմանք տարեցության սկիզբը կապում են կոնկրետ տարիքի հետ, մյուսները կարծում են, որ ավելի կարևոր է մարդու հոգեվիճակը։ Նրանց խոսքով՝ մարդը կարող է ֆիզիկապես երիտասարդ լինել, բայց իրեն տարեց զգալ այն ժամանակ, երբ հոգեպես է սկսում ծերանալ։
Տարբեր են նաև տարեցների խնդիրների մասին պատկերացումները։ Քաղաքացիներից մեկը խոսում է հասարակական տրանսպորտում տեղ չզիջելու կամ ընդհանուր վերաբերմունքի մասին, մյուսների համար հիմնական խնդիրը ընտանիքի ներսում ուշադրության և հոգատարության պակասն է։
Միևնույն ժամանակ, հարցվածների մի մասը տարեցների նկատմամբ վերաբերմունքը կապում է ընտանեկան դաստիարակության հետ։ Նրանց խոսքով՝ եթե երեխան փոքր տարիքից չի սովորում հարգել և հոգ տանել ընտանիքի ավագ անդամների մասին, այդ վերաբերմունքը հետագայում կարող է պահպանվել նաև հասարակության մեջ։
Այսպիսով, տարեցության մասին պատկերացումները միայն թվի շուրջ չեն։ Դրանք նաև վերաբերում են նրան, թե հասարակությունն ինչպիսի տեղ է հատկացնում տարեց մարդուն՝ ընտանիքում, փողոցում և առօրյա կյանքում։
Երևանի բնակիչների պատասխանները՝ տեսանյութում։
Շողեր Ղլիջյան