Արդեն տևական ժամանակ է՝ մի քանի հարյուր բեռնատարներ չեն կարողանում Բագրատաշենի անցակետով մուտք գործել Հայաստանի Հանրապետություն։ Բեռնատարների մեծ մասը կանգնած է վրացական կողմի ավտոկայանատեղիում, մի մասն էլ՝ հարակից տարածքներում։
Ստեղծված իրավիճակը լուրջ անհարմարություններ է պատճառում բեռնատարների վարորդներին, որոնք, երկար ճանապարհներ անցնելուց հետո, ստիպված են լինում ժամերով ու օրերով սպասել՝ շարունակելու իրենց երթուղին։ Վարորդների խոսքով՝ նման ուշացումների պատճառները հստակ չեն ներկայացվում, ինչն էլ ավելի է մեծացնում նրանց դժգոհությունը։
Shamshyan.com-ի թղթակցի հետ զրույցում վարորդներից մեկն ասել է․
«Հազարավոր կիլոմետրեր անցնում ենք, գնում-գալիս, բայց հետո կանգնում ենք նման իրավիճակի առաջ։ Վրացական բեռնատարներն արագ մտնում են մեր երկիր, հետո դուրս գալիս, իսկ մենք օրերով այստեղ կանգնած ենք։ Ասում են՝ հայկական կողմը դանդաղ է աշխատում, բայց մեկ է՝ չենք հասկանում՝ որն է պատճառը»։
Վարորդները հույս ունեն, որ խնդիրը հնարավորինս արագ կկարգավորվի, և իրենք կկարողանան առանց նման երկարատև սպասումների մուտք գործել Հայաստան ու շարունակել իրենց աշխատանքը։