Ֆրանսիայում գողացված շքեղ պայուսակները հայտնվել են վերավաճառքի հարթակներում․ գնորդներին զգուշացնում են:
Ֆրանսիայում անկարգությունների ժամանակ կողոպտված շքեղ ապրանքները, ըստ Bloomberg-ի, սկսել են հայտնվել վերավաճառքի Vinted հարթակում։
Կասկածելի հայտարարություններում առաջարկվում են Celine, Hermès և Louis Vuitton ապրանքանիշերի պայուսակներ։
Հաղորդվում է, որ հարթակը ստիպված է եղել ուժեղացնել հայտարարությունների ստուգումը և հեռացնել կասկածելի հրապարակումները։ Խնդիրն այն է, որ Vinted-ում վաճառքի հանվող յուրաքանչյուր թանկարժեք իր նախապես պարտադիր փորձագիտական ստուգում չի անցնում։
Ֆրանսիայի թվային տեխնոլոգիաների նախարար Անն Լե Էնանոֆը կոչ է արել առցանց հարթակներին անհապաղ հեռացնել հնարավոր գողացված ապրանքների հայտարարությունները և համագործակցել պետական մարմինների հետ։
Շքեղ ապրանքների վերավաճառքի մասնագետ Գրեհեմ Վեցբարգերը գնորդներին խորհուրդ է տվել զգուշանալ հատկապես այն պայուսակներից, որոնք Ֆրանսիայում վաճառքի են հանվել անկարգություններից անմիջապես հետո, ունեն պիտակներ և առաջարկվում են կասկածելիորեն ցածր գնով։
Մասնագետի խոսքով՝ նման դեպքերում անհրաժեշտ է նախ պարզել ապրանքի ծագումը, ապա միայն որոշում կայացնել գնում կատարելու մասին։