Թբիլիսիի 170-ամյա հայկական թատրոնը շուտով կհյուրընկալի հանդիսատեսին։ Երկու ամսից թատրոնի վարագույրը կբացվի իր պատմական շենքում, որտեղ վերջին 15 տարիներին ներկայացումներ չեն խաղացել։
Չնայած սեփական բեմի բացակայությանը՝ թատրոնը շարունակել է իր գործունեությունը՝ տարիներ շարունակ հյուրախաղերով հանդես գալով և պահպանելով ստեղծագործական ակտիվությունը։ Այդ ընթացքում տարեկան միջինը չորս նոր ներկայացում է բեմադրվել, ինչի շնորհիվ այսօր թատրոնն ունի հարուստ խաղացանկ։
Այս տարիներին թատրոնը գործել է անիվների վրա՝ հյուրախաղերով ներկայանալով հանդիսատեսին։ Այսօր խաղացանկում շուրջ 38 ներկայացում կա՝ հայ, վրացի և եվրոպացի դրամատուրգների ստեղծագործությունների հիման վրա։
Թատրոնի դերասանական կազմում հիմնականում երիտասարդ սերնդի ներկայացուցիչներ են։ Ներկայացումները թարգմանվում են վրացերեն, անգլերեն և ռուսերեն, իսկ թատրոնը տարիների ընթացքում մասնակցել է տարբեր թատերական փառատոնների։
Թատրոնի պատմության մեջ կարևոր իրադարձություն է շենքի վերակառուցումը։ Բիձինա Իվանիշվիլիի նախաձեռնությամբ թատրոնի շենքը կառուցվել է հիմքից։
Նոր դահլիճը նախատեսված է 400 հանդիսատեսի համար։
170-ամյա հայկական թատրոնի վերադարձը սեփական բեմ նոր էջ կբացի նրա պատմության մեջ՝ հնարավորություն տալով շարունակելու թատերական ավանդույթները և նոր հանդիպումներ ունենալու հանդիսատեսի հետ։