Գյուղատնտեսության ոլորտում նախատեսվում է ներդնել հարկային նոր համակարգեր, որոնք ավելի շատ սոցիալական, քան զուտ ֆիսկալ (բյուջետային) նպատակներ են հետապնդում։ Այս մասին կառավարության նիստում հայտարարել է վարչապետ Նիկոլ Փաշինյանը։
Վարչապետի խոսքով՝ տասնյակ գյուղերում քաղաքացիները հաճախ են բարձրացնում այն հարցը, թե ինչու իրենց կատարած աշխատանքը ստաժ չի համարվում։ Պարզաբանելով, որ աշխատանքային ստաժն ու կուտակային կենսաթոշակը ձևավորվում են եկամտային հարկի վճարումների միջոցով, նա նշել է, որ գյուղացիներն իրենք են հավանություն տվել հարկային դաշտ մտնելու հնարավորությանը, երբ հասկացել են դրա առավելությունները։
«Գյուղացիական տնտեսություններն այս պահին որոշակիորեն դուրս են մնում հարկային համակարգից։ Արդյունքում՝ նրանք չունեն հայաստանյան չափանիշներով գոնե միջին թոշակային ապահովագրություն, առողջության ապահովագրություն և չեն օգտվում եկամտահարկի վերադարձի ծրագրերից»,— նշել է Փաշինյանը՝ հավելելով, որ հարկային դաշտ մտնելով՝ գյուղացիները հնարավորություն կստանան ունենալու կուտակային կենսաթոշակ և ներառվելու առողջության ապահովագրության համակարգում։
Անդրադառնալով առողջության համընդհանուր ապահովագրության համակարգի արդյունքներին՝ վարչապետը տեղեկացրել է, որ առաջին 9 ամիսների տվյալներով՝
- 65+ տարիքի 26,914 թոշակառու օգտվել է 1 մլն դրամ և ավելի արժողությամբ ծառայություններից (որոնցից մի քանիսի դեպքում գումարը հասել է 1-4 մլն դրամի),
- 500,000 դրամ և ավելի ծառայություններից օգտվել է 62,116 կենսաթոշակառու,
- Ընդհանուր առմամբ, բոլոր խմբերից 97,582 մարդ ստացել է 500,000+ դրամի բժշկական աջակցություն,
- 4 մլն դրամ և ավելի արժողությամբ ծառայություններից օգտվել է 65-ից բարձր տարիքի 2,021 անձ։
Վարչապետը հիշեցրել է, որ միայն թոշակառուների առողջության ապահովագրության համար ընթացիկ տարվա առաջին 9 ամիսներին ծախսվել է ավելի քան 320 մլն դոլար (117 մլրդ դրամից ավելի)։ Առողջության համընդհանուր ապահովագրության շահառուների թիվը, որը մինչ այժմ 1,7 միլիոն էր, հունվարի 1-ից կդառնա շուրջ 2 միլիոն: