Ուկրաինական զորքերը հինգշաբթի խոցել են ռուսական երկու Սու-34 կործանիչ-ռմբակոծիչներ Վոլգոգրադի մարզի Մարինովկա ռազմական օդանավակայանում։ Այս մասին հայտարարել են Ուկրաինայի ԶՈւ գլխավոր շտաբում՝ Վորոնեժի մարզի Բորիսոգլեբսկ օդանավակայանի վրա հարձակումից երկու շաբաթ անց, որտեղ, Ուկրաինայի ԶՈւ ռազմածովային ուժերի տվյալներով, ոչնչացվել էին վեց արդիականացված Սու-34Մ ինքնաթիռներ։
Հոկտեմբերի 29-ի հարվածը, ինչպես և նախորդը, հասցվել է «Նեպտուն» առափնյա հրթիռային համալիրով, ասվում է գլխավոր շտաբի հաղորդագրության մեջ, որտեղ հարձակման հաջողության ապացույցներ չեն ներկայացվում։ Երկու Սու-34 ինքնաթիռների ոչնչացումը հաստատել է նախագահ Վոլոդիմիր Զելենսկին։ Նա հավելել է, որ Ուկրաինայի ԶՈւ-ն խոցել է նաև «Իսկանդեր» արձակման կայանք, սակայն մանրամասներ չի ներկայացրել։
Ինչպես պնդում է ուկրաինական «Դոսյե շպիոնա» աղբյուրը, Մարինովկա օդանավակայանին հասցված հարվածի և երկու Սու-34 ինքնաթիռների խոցման հետևանքով զոհվել է երկու զինծառայող, ևս երկուսը վիրավորվել են։ Նշվում է, որ հարձակման ենթարկված օբյեկտն օգտագործվում է ՌԴ ռազմաօդային ուժերի 11-րդ խառը ավիագնդի կողմից։
Սու-34-ը (ՆԱՏՕ-ի դասակարգմամբ՝ Fullback) չորրորդ սերնդի բազմաֆունկցիոնալ ճակատային գերձայնային կործանիչ-ռմբակոծիչ է, որը Ուկրաինայի ռազմական հետախուզությունը բնութագրում է որպես ՌԴ հարվածային ավիացիայի առանցքային բաղադրիչներից մեկը։
«Նման ինքնաթիռների ոչնչացումը նվազեցնում է հակառակորդի՝ կառավարվող ավիառումբերով Ուկրաինայի մերձճակատային տարածքներին, քաղաքացիական ենթակառուցվածքներին և մեր զինվորների առաջապահ դիրքերին հարվածելու հնարավորությունները», — հայտարարել են Ուկրաինայի գլխավոր շտաբում։ Այնտեղ հավելել են, որ Սու-34-ները կարող են կրել մինչև 8 տոննա մարտական բեռ, իսկ նման ինքնաթիռի շուկայական արժեքը կազմում է մոտ 50 մլն դոլար։
Oryx նախագծի հաշվարկներով՝ այսօրվա դրությամբ փաստաթղթերով հաստատված է պատերազմի ընթացքում առնվազն 43 նման ինքնաթիռի, այդ թվում՝ Սու-34Մ տարբերակի ոչնչացումը և ևս չորսի վնասվելը։
2026 թվականի հոկտեմբերի 22-ի դրությամբ Ռուսաստանն իր սպառազինության մեջ ընդհանուր առմամբ ուներ տարբեր մոդիֆիկացիաների շուրջ 140 Սու-34 կործանիչ, այդ թվում՝ արդիականացված Սու-34Մ-ներ, հայտարարել են Ուկրաինայի հետախուզության գլխավոր վարչությունում։