Թուրքիայի նախագահ Ռեջեփ Թայիփ Էրդողանը հայտարարել է, որ Թյուրքական պետությունների կազմակերպությունը (ԹՊԿ) պետք է ավելի մեծ ջանքեր գործադրի Պաղեստինի շուրջ հակամարտությունը լուծելու համար․ գրում է ТАСС-ը:
«Ես կարծում եմ, որ որպես թյուրքական պետություններ՝ մենք պետք է ավելի մեծ ջանքեր գործադրենք Պաղեստինի հարցի արդարացի լուծման հասնելու համար, որը մեզ համար մնում է արնահոսող վերք։ Սա ներառում է մարդասիրական օգնության մատակարարումը Գազային և վերակառուցման աշխատանքների արագ մեկնարկի համար անհրաժեշտ աջակցության տրամադրումը։ Մենք պետք է շարունակենք աջակցել 1967 թվականի սահմաններում անկախ և ինքնիշխան Պաղեստինյան պետության ստեղծմանը՝ Արևելյան Երուսաղեմ մայրաքաղաքով», – ասել է Էրդողանն Անկարայում ԹՊԿ գագաթնաժողովի բացման ժամանակ։
Խոսելով Կովկասում տիրող իրավիճակի մասին՝ Թուրքիայի առաջնորդը նշել է, որ «աջակցում է այն շփումներին, որոնք Ադրբեջանն իրականացնում է Հայաստանի հետ»։
«Հայտնում եմ մեր հանձնառությունը հարատև խաղաղության հասնելու գործում հնարավոր առավելագույն ներդրումն ունենալու հարցում։ Մեր տարածաշրջանում հակամարտությունն օգուտ չի բերում կողմերից ոչ մեկին և լուրջ հետևանքներ է ունենում համաշխարհային տնտեսության, առևտրի ու էներգետիկ շուկաների համար»,- ասել է նա։
Էրդողանը նաև «հույս է հայտնել, որ Իրանի շուրջ իրավիճակի վերջին սրացումը կլուծվի դիվանագիտական ճանապարհով, այլ ոչ թե ուժով»։