Իսրայելում ԱՄՆ դեսպան Մայք Հաքաբիի հայտարարությունն այն մասին, թե Իրանի դեմ ԱՄՆ-ի և Իսրայելի պատերազմի հակառակորդները «Սատանայի ազդեցության տակ են», համացանցում քննադատության ալիք է առաջացրել, այդ թվում՝ ամերիկացի պահպանողականների շրջանում, պարզել է Al Jazeera հեռուստաալիքը։
Որոշ օգտատերեր կոչ են արել դիվանագետին հեռացնել պաշտոնից։
Հաքաբին այս հայտարարությունն արել է հոկտեմբերի 23-ին The Anchor Podcast փոդքասթում, որը վարում է իսրայելցի հաղորդավար Ամիր Ցարֆաթին։ Ըստ դեսպանի, «Սատանան կուրացրել է Իրանի դեմ պատերազմը քննադատողների միտքը» և «տիրել նրանց մտածողությանը»։ Նա նաև հայտարարել է, որ ռազմական գործողությունների հակառակորդները գտնվում են «հոգևոր խավարի» և «հոգևոր կուրության» վիճակում։
Հարցազրույցի հատվածը հանգստյան օրերին լայնորեն տարածվել է սոցիալական ցանցերում և բացասական արձագանք առաջացրել ԱՄՆ-ում վերջերս կայացած միջանկյալ ընտրությունների ֆոնին։ Դրանց արդյունքները շատերը համարել են Դոնալդ Թրամփի վարչակազմի քաղաքականության, այդ թվում՝ Իրանի դեմ նրա ռազմական արշավի գնահատականը։
Պահպանողական The American Conservative պարբերականի ավագ խմբագիր Էնդրյու Դեյը հեգնանքով է մեկնաբանել դիվանագետի խոսքերը. ««Գիտեմ, մի փոքր զվարճալի է հնչում, երբ դեսպանը նման բաներ է ասում՝ դատողություններ անելով այն մասին, թե Իրանի դեմ պատերազմին ընդդիմացող մարդկանց «Սատանան է կառավարում»»։
«Այո՛, հենց այդպես էլ հնչում է»,— նշել է Դեյը։
Այլ օգտատերեր պահանջել են Հաքաբիին հեռացնել պաշտոնից՝ նրա հայտարարությունների պատճառով։