Վրաստանի իշխանությունները հաջողությամբ կանխել են պետական հեղաշրջման փորձը․ Շոյգու

Ռուսաստանի Անվտանգության խորհրդի քարտուղար Սերգեյ Շոյգուն բարձր է գնահատել Վրաստանի կառավարության որդեգրած քաղաքականությունը և ողջունել Մոսկվայի ու Թբիլիսիի միջև տնտեսական կապերի խորացումը։

Այս մասին Շոյգուն հայտարարել է նոյեմբերի 9-ին Մոսկվայում՝ ԱՊՀ անդամ պետությունների անվտանգության խորհուրդների քարտուղարների 14-րդ ամենամյա հանդիպման ժամանակ։

«2024 թվականին Վրաստանի իշխանությունները հաջողությամբ կանխել են արևմտամետ ընդդիմության նախաձեռնած պետական հեղաշրջման փորձը», – նշել է Շոյգուն։

Շոյգուն նաև անդրադարձել է Ռուսաստանի և Վրաստանի միջև տնտեսական համագործակցության զարգացմանը։

«Մենք ողջունում ենք Վրաստանի և Ռուսաստանի միջև առևտրատնտեսական համագործակցության ակտիվ զարգացումը։ Միևնույն ժամանակ ընդգծում եմ, որ տարածաշրջանային խնդիրները պետք է լուծվեն քաղաքական-դիվանագիտական միջոցներով՝ առանց արտաքին երկրների միջամտության», – հայտարարել է Ռուսաստանի Անվտանգության խորհրդի քարտուղարը։

Շոյգուն կարևորել է նաև «3+3» տարածաշրջանային խորհրդատվական հարթակի աշխատանքի վերսկսումը։ Ներկայումս այդ ձևաչափում ընդգրկված են Ռուսաստանը, Իրանը, Թուրքիան, Հայաստանը և Ադրբեջանը։

Նրա խոսքով՝ Հարավային Կովկասում իրավիճակը բարելավվում է, իսկ «հայ-ադրբեջանական հարաբերությունների կարգավորումն ու տարածաշրջանում փաստացի խաղաղության հաստատումը արդյունքներ են տալիս»։

Leave a Reply

Your email address will not be published. Required fields are marked *