«Առողջության իրավունք» ՀԿ-ի նախագահ Անուշ Պողոսյանի ֆեյսբուքյան գրառումը․ «ԱՎՏՈԿԼԱՎՆԵՐԻ ԱՆՎՏԱՆԳՈՒԹՅԱՆ ՄԱՍԻՆ
Ներկայացված լուսանկարում երևում է բժշկական սարքավորման ներքին հատվածը՝ աղտոտվածության, նստվածքների և գունափոխված մակերեսների հետքերով։ Այս ամենն առնվազն մասնագիտական գնահատման և տեխնիկական զննության անհրաժեշտություն է առաջացնում։
Այս խնդրով առաջարկություն եմ ներկայացրել ՀՀ առողջապահության նախարարություն՝ ավտոկլավների տեխնիկական անվտանգության պահանջները հստակեցնելու և դրանց նկատմամբ վերահսկողության մեխանիզմներ ներդնելու վերաբերյալ։
Նախարարության պաշտոնական պատասխանում նշվել է, որ առաջարկությունն ընդունվել է ի գիտություն, և իրավական կարգավորումներում փոփոխությունների անհրաժեշտությունը կուսումնասիրվի և կքննարկվի։
Իհարկե, լավ է, որ արձագանք կա, բայց միայն ուսումնասիրությամբ հարցը չի լուծվելու։
Ինձ համար կարևոր է, որ այս ամենը վերածվի կոնկրետ գործողությունների՝ հստակ պահանջներ, պարտադիր տեխնիկական զննություն և պատշաճ վերահսկողություն։
Խոսքը միայն սարքավորումների տեխնիկական վիճակի մասին չէ։ Խոսքը և՛ բուժաշխատողի, և՛ պացիենտի անվտանգության մասին է։ Բուժաշխատողը պետք է աշխատի անվտանգ պայմաններում, իսկ պացիենտը պետք է վստահ լինի, որ բժշկական միջամտության ընթացքում օգտագործվող գործիքներն անցել են պատշաճ ախտահանում և մանրէազերծում»։