Հունվարի 1-ից գյուղատնտեսական փոքր վարկերի սուբսիդավորումը կդադարեցվի․ Կառավարության նոր նախագիծը

ՀՀ կառավարության այսօրվա նիստի օրակարգում ընդգրկված է նախագիծ, որով առաջարկվում է 2027 թվականի հունվարի 1-ից դադարեցնել ագրոպարենային ոլորտի տնտեսավարողներին տրամադրվող գյուղատնտեսական փոքր վարկերի տոկոսադրույքների սուբսիդավորման ծրագիրը:

Ըստ նախագծի՝ Կառավարության 2026 թվականի ապրիլի 9-ի N 468-Լ որոշմամբ հաստատված ծրագրի գործողության ժամկետը նախատեսվում է սահմանափակել միայն 2026 թվականով, իսկ վարկային պայմանագրերի կնքման վերջնաժամկետ սահմանել 2026 թվականի դեկտեմբերի 30-ը ներառյալ:

Փոփոխության հիմնավորումները և վարչապետի հանձնարարականը

ՀՀ էկոնոմիկայի նախարարության մշակած նախագծի հիմնավորման համաձայն՝ փոփոխության անհրաժեշտությունը պայմանավորված է 2026 թվականի սեպտեմբերի 17-ին վարչապետի մոտ կայացած խորհրդակցության արդյունքում տրված հանձնարարականով: Դրանով նախատեսվել է համապատասխան միջոցներ ձեռնարկել 2027 թվականից սուբսիդավորման ծրագիրը դադարեցնելու ուղղությամբ:

Ներկայումս գործող կարգավորմամբ ծրագիրը նախատեսված էր 2026-2027 թվականների համար, սակայն նոր նախագծով դրա իրականացման ժամանակահատվածը կսահմանափակվի 2026 թվականով:

Տրամադրված վարկերի ծավալները և բյուջեի վրա ազդեցությունը

Էկոնոմիկայի նախարարության ներկայացրած տվյալներով՝ ծրագրի մեկնարկից մինչև 2026 թվականի սեպտեմբերի 30-ն ընկած ժամանակահատվածում տրամադրվել է 26 841 վարկ՝ ընդհանուր շուրջ 47.74 միլիարդ դրամի չափով։

Նախագծում ընդգծվում է, որ վարկային պայմանագրեր կնքելու հնարավորությունը կգործի մինչև 2026թ. դեկտեմբերի 30-ը, ինչից հետո՝ 2027 թվականից, ծրագիրն այլևս չի գործի:

Միևնույն ժամանակ, նախագծի ընդունումը 2026 թվականի պետական բյուջեում եկամուտների կամ ծախսերի փոփոխություն չի ենթադրում: Ըստ հիմնավորման՝ փոփոխության նպատակն է հստակեցնել ծրագրի իրականացման և ֆինանսական կառույցների ու շահառուների միջև պայմանագրերի կնքման վերջնական ժամկետները:

Leave a Reply

Your email address will not be published. Required fields are marked *