Դաղստանում սպանվել է Ռուսաստանի սամբոյի առաջնության բրոնզե մեդալակիր, 31-ամյա Մագոմեդ Դավուդովը։ Ռուսական լրատվամիջոցների տեղեկություններով՝ միջադեպը տեղի է ունեցել «Մարաքեշ» հանդիսությունների սրահի մոտ։
Միջոցառմանը մասնակցած մարզիկի ուղղությամբ շենքից դուրս գալուց հետո կրակ են բացել սև Toyota Camry մակնիշի ավտոմեքենայից։ Փամփուշտներից մեկը դիպել է Դավուդովի գլխին։ Վիրավորում ստացած մարզիկը մահացել է հիվանդանոց տեղափոխվելու ճանապարհին։
Դավուդովի սպանության կասկածանքով ձերբակալվել է Մախաչկալայի 23-ամյա բնակիչ։ Այս մասին ՏԱՍՍ-ին հայտնել են ուժային կառույցներից։