ԱՄՆ նախագահի հատուկ բանագնաց Ջարեդ Քուշները X սոցիալական ցանցում գրել է, որ Վաշինգտոնը շարունակում է խորհրդակցությունները Ռուսաստանի, Ուկրաինայի և եվրոպացի գործընկերների հետ՝ խաղաղ կարգավորման ուղղությամբ հաջորդ քայլերի շուրջ։
Նրա խոսքով՝ այժմ ամերիկյան կողմը կենտրոնացած է Մոսկվայի և եվրոպական երկրների միջև անմիջական փոխգործակցության կազմակերպման, ինչպես նաև եռակողմ բանակցությունների հաջորդ փուլի օրակարգի նախապատրաստման վրա։
Քուշները նշել է, որ վերջին քննարկումների ընթացքում նոր գաղափարներ են ի հայտ եկել, որոնք այժմ մշակվում են։ Դրանցից մի քանիսը կարող են անմիջականորեն հանգեցնել բեկման, իսկ մյուսները՝ հիմք դառնալ նոր առաջարկների համար, որոնք կարող են օգնել հաղթահարել մնացած տարաձայնությունները։
Հատուկ բանագնացի խոսքով՝ ԱՄՆ նախագահ Դոնալդ Թրամփը կարծում է, որ կայուն խաղաղությունն անհնար է առանց Ուկրաինայի անվտանգության հուսալի երաշխիքների և հետպատերազմյան անվտանգության վերաբերյալ մանրամասն գործնական պայմանավորվածությունների, որոնք կնվազեցնեն նոր հակամարտության վտանգը։
«ՆԱՏՕ-ն կմնա եվրոպական անվտանգության կարևորագույն հենասյունը»,— ընդգծել է Քուշները։ Նա հավելել է, որ անհրաժեշտ է ամրապնդել ռազմական փոխգործակցության, հաղորդակցության, բախումների կանխարգելման և փոխադարձ լարվածության թուլացման մեխանիզմները, ինչպես նաև ստեղծել տարաձայնությունները կարգավորելու գործնական միջոցներ՝ նախքան դրանց վերաճումը ճգնաժամերի։ Հենց այդ պատճառով ԱՄՆ-ը ձգտում է ապահովել եվրոպացի գործընկերների անմիջական մասնակցությունը քննարկումներին։
Քուշները նաև նշել է, որ ցանկացած վերջնական համաձայնագիր պետք է համաձայնեցվի բոլոր այն կողմերի հետ, որոնց այն վերաբերում է։ Նրա խոսքով՝ Թրամփը կաջակցի միայն այնպիսի պայմանավորվածությունների, որոնք կամրապնդեն Ուկրաինայի և Եվրոպայի անվտանգությունը և կնվազեցնեն նոր զինված հակամարտության հավանականությունը։
Մեկնաբանելով կողմերի առավելապաշտական պահանջների մասին լրատվամիջոցների հաղորդագրություններն ու կոշտ քաղաքական հռետորաբանությունը՝ հատուկ բանագնացը հայտարարել է, որ փակ բանակցությունների ընթացքում երկու կողմերն էլ գիտակցում են պատերազմն ավարտելու համար գործնական փոխզիջումների անհրաժեշտությունը։
Քուշները խոստովանել է, որ հակամարտության հետևանքով մարդկային կորուստները հսկայական են, իսկ քննարկվող հարցերը շարունակում են չափազանց բարդ մնալ։ Միաժամանակ, նա հավաստիացրել է, որ կարգավորման ուղղությամբ աշխատանքը շարունակվում է։ Նրա խոսքով՝ բանակցությունների մասնակիցները մտադիր են պահպանել զգայուն քննարկումների գաղտնիությունը և ուղիներ փնտրել պատերազմն ավարտելու և ամուր խաղաղություն հաստատելու համար։