Թուրքիայի արտաքին գործերի նախարար Հաքան Ֆիդանի խոսքով՝ Ռուսաստանի և Ուկրաինայի միջև շարունակվող պատերազմի հիմնական պատճառներից մեկը Դոնբասի մնացած տարածքների շուրջ տարաձայնություններն են։
«Ռուսներն ասում են՝ սա իմ սահմանների սահմանման մեջ է մտնում։ Իսկ ուկրաինացիներն ասում են՝ ոչ, սա մեր հայրենիքի տարածքն է, մենք չենք հրաժարվի դրանից»,- նշել է Թուրքիայի արտգործնախարարը։
Նրա գնահատմամբ՝ հենց այս հարցն է ներկայումս պատճառներից մեկը, որի պատճառով պատերազմը շարունակվում է։
Ֆիդանը նաև ներկայացրել է տարածքի չափի վերաբերյալ կողմերի տարբեր գնահատականները։ Նրա խոսքով՝ ռուսական հաշվարկներով խոսքը Դոնբասի մոտ 11-12 տոկոսի մասին է, մինչդեռ ուկրաինական կողմի դիտարկմամբ՝ այդ տարածքը կազմում է շուրջ 18 տոկոս։
Անդրադառնալով Սև ծովում իրավիճակին՝ Թուրքիայի արտգործնախարարը նշել է, որ Ռուսաստանը չի ցանկանում Ուկրաինայի հետ ժամանակավոր համաձայնության գալ՝ առանց երկարաժամկետ խաղաղության պայմանագրի։