ԵՐԵՎԱՆ, 30 ապրիլի․/ԱՌԿԱ/․ Գործադիրը հինգշաբթի կայացած նիստում հավանության է արժանացրել «Պետական տուրքի մասին» օրենքում լրացումներ և փոփոխություններ կատարելու մասին» օրենքի նախագիծը, որոնք նախատեսում են վերանայումներ բանկային ոլորտի հարկման համակարգում։
Ինչպես հայտնել է ՀՀ ֆինանսների փոխնախարար Արման Պողոսյանը, բանկերի կողմից իրականացվող ֆինանսական գործառնությունների և գործարքների զգալի մասն ազատված է ԱԱՀ-ից, մինչդեռ Հայաստանի բանկային հատվածը վերջին տարիներին տնտեսական ակտիվության աճի ֆոնին շահութաբերության բարձր մակարդակ է դրսևորում։
Նրա խոսքով՝ մի շարք երկրներ ԱԱՀ-ի փոխարեն կիրառում են կարգավորման այլընտրանքային մեխանիզմներ։
«Առաջարկվում է Հայաստանում ներդնել հարկման այլընտրանքային լրացուցիչ կանոններ»,- ասել է Պողոսյանը։
Նա նշել է, որ նախատեսվում է գտնել այնպիսի լուծում, որը ճնշում չի գործադրի բանկային գործունեության և տոկոսադրույքների վրա, ինչպես նաև չի հանգեցնի գնաճային ռիսկերի ձևավորմանը քաղաքացիների ու բիզնեսի համար։
«Եթե բանկային հատվածից կապիտալ է դուրս բերվում, օրինակ՝ շահույթի բաշխման միջոցով, այսինքն՝ եթե բաժնետերերին վճարվում է շահույթի մի մասը, ապա այդ շահաբաժինը կհարկվի ոչ թե ստանդարտ 5% դրույքաչափով, այլ 15%-ով»,- ասել է Պողոսյանը՝ ներկայացնելով կառավարության որոշման մանրամասները։
Ֆինանսների փոխնախարարը նաև հայտնել է, որ նախատեսվում է խթանել բանկերի բաժնետոմսերի ցուցակումը միջազգային բորսաներում։
ՖՀՄՍ ստանդարտներով հրապարակվող բանկերի հաշվետվությունների համաձայն՝ Հայաստանի բանկային համակարգի զուտ շահույթը 2025 թվականին կազմել է 421,3 մլրդ դրամ՝ 2024 թվականի համեմատ աճելով 16,01%-ով։ 2026 թվականի առաջին եռամսյակում բանկերի զուտ շահույթը կազմել է 103,48 մլրդ դրամ՝ 2025 թվականի նույն ժամանակահատվածի 101,18 մլրդ դրամի դիմաց՝ աճելով 2,27%-ով։