Քաղաքական մեկնաբան Հակոբ Բադալյանի ֆեյսբուքյան գրառումը. «Կրկնեմ, Երեւանում անցկացված եվրոպական քաղաքական համայնք նախաձեռնության գագաթնաժողովը ըստ էության առավել հակաամերիկյան, քան հակառուսական միջոցառում էր:
Այդ համատեքստում միջոցառման հակառուսականության վրա արվող շեշտադրումները, առավել եւս այսպես ասած ռուսաստանյան շրջանակներից, այլ բան չեն, քան քարոզչական աջակցություն վարչապետ Փաշինյանին:
Թե ինչո՞ւ է ցուցաբերվում այդ աջակցությունը, առանձին հաց է: Ես ինքս 2022-23-ից ի վեր խոսում եմ այդ մասին, առարկելով այն գնահատականներին, թե Նիկոլ Փաշինյանը վարում է հակառուսական քաղաքականություն:
Ըստ իս, դա՝ կամ թյուրըմբռնում է, կամ մոլորություն, կամ էլ հանրությանը մոլորեցնելու փորձ: Կստացվի, որ նա վարում է հակաամերիկյա՞ն քաղաքականություն: Ոչ իհարկե:
Նիկոլ Փաշինյանը ընդհանրապես քաղաքականություն չի վարում վաղուց: Նիկոլ Փաշինյանը վաղուց հայտնվել է ադրբեջանական քաղաքականության միջոցի կարգավիճակում՝ կամա, թե ակամա: Սա է նաեւ պատճառը, որ ես պարբերաբար արտահայտում եմ գնահատականս՝ Հայաստանում կա իշխանության փոփոխության անհրաժեշտություն, որպես նվազագույն խնդիր՝ հետագա մյուս անհրաժեշտ փոփոխությունների համար»: