Լիտվայի Հանրապետության արտաքին գործերի նախարարությունը մայիսի 8-ին Վիլնյուսում Ռուսաստանի դեսպանատան ներկայացուցչին է հանձնել բողոքի նոտա, որով խիստ դատապարտել է Ռուսաստանի ԱԳՆ-ի օտարերկրյա պետություններին ուղղված «նախազգուշացումը»՝ կապված Կիևից դիվանագիտական և այլ անձնակազմի ու քաղաքացիների տարհանման հետ՝ Ռուսաստանի Դաշնության զինված ուժերի կողմից ծրագրվող հարձակումների պատճառով, նշվել է Լիտվայի արտաքին քաղաքական գերատեսչության հայտարարության մեջ։
Նոտայում ընդգծվել է, որ Ռուսաստանի այդ հայտարարությունները պետք է դիտարկել որպես «Կիևում օտարերկրյա դեսպանատների և Կիևի այլ բնակիչների դեմ ուժի կիրառման ուղղակի, ցինիկ և աննախադեպ սպառնալիք»։
«Ռուսաստանի շարունակվող ագրեսիան Ուկրաինայի դեմ, ինչպես նաև Ռուսաստանի նման հրապարակային հայտարարություններն ակնհայտորեն խախտում են ուժի կիրառման սպառնալիքի արգելքը, որն ամրագրված է ՄԱԿ Կանոնադրության 2-րդ հոդվածի 4-րդ կետում, և ՄԱԿ Կանոնադրությամբ ամրագրված ու համընդհանուր ճանաչված միջազգային իրավունքի մյուս սկզբունքները։
Ռուսաստանի դեսպանատան ներկայացուցչին հայտնել են, որ նման հայտարարություններ անելով՝ Ռուսաստանը փաստացի ընդունում է, որ իր զինված ուժերը ծրագրում են մահաբեր և անիմաստ սպառնալիք ներկայացնել միջազգային պաշտպանության ներքո գտնվող անձանց, դիվանագետների, քաղաքացիական բնակչության և քաղաքացիական ենթակառուցվածքների համար, այսինքն՝ շարունակել կատարել Ուկրաինայում ամենածանր միջազգային հանցագործությունները։ Նրան նաև հիշեցրել են, որ միջազգային մարդասիրական իրավունքի համաձայն՝ ռազմական հարձակումը, եթե հայտնի է, որ այդ հարձակումը կհանգեցնի քաղաքացիական բնակչության պատահական մահվան կամ վնասվածքների, քաղաքացիական օբյեկտների վնասման, համարվում է միջազգային մարդասիրական իրավունքի լուրջ խախտում և որակվում է որպես ռազմական հանցագործություն։
Լիտվայի արտաքին գործերի նախարարությունն ընդգծել է, որ Լիտվան Ռուսաստանի ԱԳՆ նոտան դիտարկում է ոչ միայն որպես շարունակվող և ծրագրվող ագրեսիայի, պատերազմի և Ռուսաստանի այլ միջազգային հանցագործությունների ուղղակի ապացույց, այլև որպես միջազգային իրավունքի նկատմամբ Ռուսաստանի արհամարհանքի հերթական վառ օրինակ։
Լիտվան կտրականապես մերժում է այդ սպառնալիքները և պնդում է, որ Ռուսաստանը անհապաղ և անվերապահորեն պետք է դադարեցնի ագրեսիան Ուկրաինայի դեմ, իր ռազմական հանցագործությունները, մարդկության դեմ հանցագործությունները և այլ միջազգային հանցագործությունները, դուրս բերի իր օկուպացիոն ուժերը Ուկրաինայի ողջ միջազգայնորեն ճանաչված տարածքից և փոխհատուցի Ուկրաինային ռուսական ագրեսիայի պատճառած ողջ վնասը։
Լիտվան հաստատակամորեն աջակցում է Ուկրաինային, որն ավելի քան չորս տարի պաշտպանվում է ռուսական ագրեսիայից։
Կիևում Լիտվայի դեսպանատունը շարունակում է իր աշխատանքը, միևնույն ժամանակ, նրա աշխատակիցները հետևում են անվտանգության սովորական պահանջներին»,- նշվել է գերատեսչության հաղորդագրությունում։