Այսօր՝ ապրիլի 10-ին, արտակարգ դեպք է տեղի ունեցել Երևանում։ Ժամը 00:50-ի սահմաններում ՀՀ Ներքին գործերի նախարարության 112 օպերատիվ կառավարման կենտրոն ահազանգ է ստացվել, որ Էրեբունի վարչական շրջանի Խաղաղ Դոնի 2/1 հասցեում կրակ և ծուխ են նկատվում։
Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են Երևանի հրշեջ-փրկարարական ջոկատներից 3 մարտական հաշվարկ։
Մինչ հրշեջների ժամանումը՝ նշված հասցեից, որն ավելի շատ օգտագործվում էր որպես կացարան և ժողովրդին հայտնի է որպես «դարիկնոց», տեղի աշխատակիցները, քաղաքացիները ու հրշեջ-փրկարարները տարհանել են 10-ից ավելի քաղաքացիների և պայքարել են կրակի տարածման դեմ, ապա ժամանած հրշեջներին հաջողվել է շատ արագ նախ կանխել կրակի տարածումը, ապա մարել այն։
Տեղում աշխատել են նաև Հայաստանի էլեկտրական ցանցեր ընկերության ներկայացուցիչները և ըստ նրանց՝ հրդեհի պատճառը քաղաքացու կողմից անցկացված էլեկտրալարերի սխալ մոնտաժման արդյունքն է, մինչդեռ շինության տերը՝ նույն ինքը «Դարիկոն», ֆոտոլրագրողի հետ զրույցում ասում էր, որ հրդեհի պատճառը էլեկտրոցանցի ոչ ճիշտ աշխատանքն է եղել, քանի որ ինքը մի քանի անգամ դիմել է էլեկտրոցանց և հայտնել, որ այդ լարերը մի օր փորձանք են դառնալու ու հիմա այսօր այդ փորձանքը եղավ և միայն իրենց աշխատակիցների և քաղաքացիների շնորհիվ կարողացել են շուտ տարհանել քաղաքացիներին։
Գ․ Շամշյանի տեղեկություններով՝ տարհանված բոլոր քաղաքացիները հնդիկներ են։
Մանրամասները՝ սկզբնաղբյուր կայքում