Հայաստանը պարտավոր է անհապաղ ներդնել կոշտ պրոտեկցիոնիզմի քաղաքականություն և վերականգնել Գյուղատնտեսության նախարարությունը՝ էժան ներկրմամբ տեղական արտադրողի ոչնչացումը կանգնեցնելու համար։ Այս մասին մայիսի 11-ին Սյունիքի մարզի Ագարակ քաղաքում ընտրողների հետ հանդիպման ժամանակ հայտարարել է «Ուժեղ Հայաստան» կուսակցությունների դաշինքի պատգակամավորական թեկնածուների համամասնական ցուցակը գլխավորող Նարեկ Կարապետյանը։
Նա ընդգծել է, որ այսօր հայ ֆերմերը պարտվողական վիճակում է՝ մրցակցելով այնպիսի երկրների ապրանքների հետ, որտեղ ագրարային հատվածը հսկայական աջակցություն է ստանում պետությունից։ Կարապետյանը կոնկրետ օրինակներ է նշել այն մասին, թե ինչպես են օտարերկրյա ապրանքները սեփական վաճառասեղաններից դուրս մղում հայրենականը։
Նրա խոսքով՝ այնպիսի երկրները, ինչպիսիք են Իրանն ու Բելառուսը, ակտիվորեն սուբսիդավորում են իրենց ֆերմերներին՝ ապահովելով նրանց էժան գազով, էլեկտրաէներգիայով և ուղղակի դոտացիաներով։ Արդյունքում ներկրվող արտադրանքն ավելի էժան է լինում, քան հայկականը, ինչը մահացու հարված է հասցնում տեղական տնտեսություններին։ «Երբ Հայաստան են ներկրում նուռ կամ այլ մշակաբույսեր, որոնք մենք ինքներս առատորեն աճեցնում ենք, դա բառացիորեն սպանում է մեր գյուղատնտեսությունը։
Մենք տեսնում ենք, թե ինչպես է Արարատյան դաշտում բերքի 20%-ը փտում և թափվում պարզապես այն պատճառով, որ շուկան լցված է բերովի ապրանքով»,- նշել է Կարապետյանը՝ հավելելով, որ առանց մասնագիտացված նախարարության գյուղացիների շահերը պաշտպանող պարզապես չկա։ Նարեկ Կարապետյանն ընդգծել է, որ ներքին շուկայի պաշտպանությունը համաշխարհային ստանդարտ պրակտիկա է, որին հետևում են բոլոր զարգացած պետությունները։
Նա պարզաբանել է, որ եթե երկիրն արտադրում է որոշակի մթերք, ապա պարտավոր է սահմանափակել դրա ներկրումը դրսից՝ սեփական քաղաքացիներին աջակցելու և պարենային անվտանգությունն ապահովելու համար։ «Եթե ես ցանկանամ ձեր նուռը տանել Պորտուգալիա, և նրանք իրենք են այդ նուռն աճեցնում, ապա կփակեն իրենց շուկան ու թույլ չեն տա ինձ ներս մտնել։ Այդ դեպքում ինչո՞ւ ենք մենք թույլ տալիս, որ մեր երկիրը դառնա «բաց դաշտ» օտարերկրյա սուբսիդավորվող ապրանքների համար։ Մեր նպատակն է այնպես անել, որ հայ գյուղացին զգա պետության պաշտպանվածությունը, այլ ոչ թե միայնակ պայքարի հարևան երկրների կողմից իրականացվող դեմպինգի դեմ»,- եզրափակել է ընդդիմադիր գործիչը։