«Այն, որ վերջին տարիներին մարզում ծնելիությունը նվազել է 10%-ով, իսկ բնակչության բնական աճը կրճատվել է 30%-ով, խորագույն ճգնաժամի ցուցանիշ է, որը հնարավոր չէ թաքցնել նոր ասֆալտի տակ»։ Մայիսի 11-ին Գեղարքունիքի մարզի բնակիչների հետ հանդիպման ժամանակ դրա մասին հայտարարել է «Հզոր Հայաստան» դաշինքի վարչապետի թեկնածու Սամվել Կարապետյանը:
Հանդիպումը տեղի է ունեցել Կարապետյանի առանձնատան բակում, քանի որ նա տնային կալանքի տակ է և չի կարող հանդիպումներ անցկացնել այլ վայրերում։
Սամվել Կարապետյանը նշել է, որ Գեղարքունիքում աղքատության մակարդակը հասել է 28%-ի՝ գերազանցելով հանրապետական միջին ցուցանիշները, և ընդգծել, որ ներկայիս թոշակներն ու ապահովագրությունները ի վիճակի չեն բարձրացնել մարդկանց կենսամակարդակը։
«Հզոր Հայաստան» դաշինքի վարչապետի թեկնածուն շեշտել է, որ սոցիալ-տնտեսական անբարենպաստ վիճակը պատճառ է դարձել ամուսնալուծությունների թվի 16% աճի և մարզից բնակչության զանգվածային արտահոսքի համար։ «Սևանի մոտ ապրող մարդիկ պարտավոր են լինել հարուստ, այլ ոչ թե գոյատևել կարիքի մեջ»,- ընդգծել է Կարապետյանը՝ առաջարկելով զարգացման համակարգային ծրագիր՝ ըստ շվեյցարական և նորվեգական մոդելների, որը հիմնված կլինի ընտանեկան բիզնեսի աջակցության և լճի ռեսուրսների արդյունաբերական օգտագործման վրա։