Իսրայելի վարչապետ Բենիամին Նեթանյահուն խոստացել է, որ Երուսաղեմը հավերժ կմնա Իսրայելի վերահսկողության տակ և բարձր է գնահատել Իրանի ու «այլ թշնամիների» դեմ պայքարում ձեռք բերված ռազմական հաջողությունները։ Դրա մասին նա հայտարարել է Երուսաղեմի օրվան նվիրված պետական արարողության ժամանակ, հայտնում է Times of Israel-ը:
«Իրանի ահաբեկչական ռեժիմն ավելի թույլ է, քան երբևէ, իսկ Իսրայել պետությունն ավելի ուժեղ է, քան երբևէ: Մենք շարունակելու ենք վճռականորեն պայքարել արմատական իսլամի ցանկացած սպառնալիքի դեմ»,- հայտարարել է Նեթանյահուն:
Նա կրկնել է իր այն պնդումը, թե «եթե Իսրայելը 2025 թվականի հունիսին և այս տարվա սկզբին ռազմական արշավներ չսկսեր Իրանի միջուկային ծրագրի և բալիստիկ հրթիռների ստեղծման ծրագրերի դեմ, ապա Իրանն արդեն այսօր կտիրապետեր միջուկային ռումբի»:
«Մեր թշնամիները ձգտում են ոչնչացնել մեզ բոլորիս՝ առանց բացառության։ Բայց նրանք ունեն նաև մեկ այլ նպատակ՝ վտարել մեզ Երուսաղեմից։ Նրանց «Մենք Երուսաղեմի ճանապարհին ենք» կարգախոսն արտահայտում է հրեա ժողովրդի սրտից մեզ հեռացնելու՝ նրանց չարամիտ մտադրությունը։ Մենք թույլ չենք տա, որ դա տեղի ունենա։ Միայն Իսրայելի կառավարմամբ Երուսաղեմն է իրապես ազատ քաղաք՝ ազատ բոլոր կրոնների և բոլոր ազգերի համար»,- ասել է նա։
Նեթանյահուն հայտարարել է Իրանի, ինչպես նաև ՀԱՄԱՍ-ի և «Հըզբոլլահի» դեմ վերջին հակամարտություններում գրանցված հաջողությունների մասին։
«Այն հզորությունը, որը մենք ցուցադրեցինք բոլոր ճակատներում և Միացյալ Նահանգներում նախագահ Թրամփի վարչակազմի հետ երբևիցե եղած ամենասերտ դաշինքը, մեր սահմաններից հեռու մեզ ոչնչացնել ձգտողներին հարվածելու մեր վճռականությունը, բուֆերային գոտիները, որոնք մենք ստեղծել ենք մեր շուրջը Գազայում, Լիբանանում և Սիրիայում՝ այս ամենը փոխել է Մերձավոր Արևելքի դեմքը։ Միևնույն ժամանակ մենք ընդլայնելու ենք համագործակցությունը մեր տարածաշրջանի չափավոր ուժերի հետ, որոնք հասկացել են Իսրայելին օգնության ձեռք մեկնելու առավելությունները»,- հայտարարել է նա։