Ֆրանսիան և Թուրքիան առաջին տեղերն են զբաղեցնում Եվրոպայի խորհրդի անդամ երկրների շրջանում քրեակատարողական հիմնարկների գերբեռնվածության մակարդակով։ Այդ երկրների բանտերում յուրաքանչյուր 100 տեղին բաժին է ընկնում 131 կալանավոր, ասված է հատուկ պատրաստված զեկույցում, հաղորդում է Ֆրանսպրես գործակալությունը։
Լոզանի համալսարանի Եվրոպայի խորհրդի (46 պետություն միավորող և Ստրասբուրգում տեղակայված կազմակերպություն) պատվերով հավաքագրված տվյալները վերաբերում են 2025 թվականի սկզբին։
Ընդ որում, Ֆրանսիայի իշխանությունների կողմից տրամադրված ավելի թարմ տվյալները մատնանշում են էլ ավելի բարձր գերբեռնվածություն. 2026 թվականի ապրիլին այն հասել է 139,1%-ի։
Տվյալներ տրամադրած 51 բանտային վարչակազմերից (որոշ երկրներ, ներառյալ Իսպանիան, Մեծ Բրիտանիան և Բոսնիան, հաշվետվություն են ներկայացնում ըստ տարածաշրջանների) 14 երկրում կալանավորների թիվը գերազանցում է հասանելի տեղերը։
Բանտերի գերբեռնվածության վարկանիշում Ֆրանսիայից և Թուրքիայից հետո հաջորդում են.
Խորվաթիան՝ 123 կալանավոր՝ 100 տեղի դիմաց
Իտալիան՝ 121
Մալթան՝ 118
Կիպրոսը՝ 117
Հունգարիան՝ 115
Բելգիան՝ 114
Իռլանդիան՝ 112
Բանտային համակարգի վրա ավելի փոքր ծանրաբեռնվածություն ունեցող երկրների թվում նշվում են.
Ուկրաինան՝ 50 կալանավոր 100 տեղի դիմաց
Իսպանիան՝ 77
Գերմանիան՝ 80
100 հազար բնակչի հաշվով կալանավորների մակարդակով առաջատար են.
Թուրքիան՝ 458
Ադրբեջանը՝ 271
Մոլդովան՝245
Այդ ցանկում Եվրոպական միության երկրների շրջանում առանձնանում են.
Հունգարիան՝ 206
Լեհաստանը՝ 189
Չեխիան՝ 178:
Ընդհանուր առմամբ, 2025 թվականի հունվարի 31-ի դրությամբ հետազոտության մեջ ընդգրկված երկրներում եղել է շուրջ 1,1 միլիոն կալանավոր, ինչը 8,5%-ով ավելի է, քան մեկ տարի առաջ։
Կալանավորների շրջանում կանանց մասնաբաժինը նույնպես աճել է՝ 2024 թվականի հունվարից մինչև 2025 թվականի հունվարն ընկած ժամանակահատվածում 4,8%-ից հասնելով 5,2%-ի։