Թայվանը չի տեղեկացվել ինքնակառավարվող կղզուն 14 միլիարդ դոլար արժողությամբ ԱՄՆ զենքի պլանավորված վաճառքի որևէ կասեցման մասին, ուրբաթ հայտարարել է կառավարության պաշտոնյան, երբ ԱՄՆ ռազմածովային ուժերի նախարարի պաշտոնակատարը Վաշինգտոնում Սենատի հանձնաժողովին հայտնել է, որ արտասահմանյան որոշ ռազմական վաճառքներ հետաձգվում են՝ ամերիկյան զինվորականներին բավարար քանակությամբ զինամթերքով ապահովելու համար, գրում է Associated Press-ը։
Այն բանից մի քանի օր անց, երբ ԱՄՆ նախագահ Դոնալդ Թրամփը կասկածներ հայտնեց Թայվանին, որը Չինաստանի միջազգայնորեն ճանաչված տարածքն է, զենքի վաճառքը շարունակելու վերաբերյալ, ԱՄՆ ռազմածովային ուժերի նախարարի պաշտոնակատար Հուն Ցաոն հինգշաբթի հայտարարեց, որ վաճառքները կվերսկսվեն, երբ վարչակազմն այն նպատակահարմար համարի։
«Թայվանի իշխանությունները ծանոթացել են հաղորդումներին, սակայն ներկա պահին տեղեկություններ չկան որևէ փոփոխության մասին, որ ԱՄՆ-ը կկատարի զենքի այս վաճառքի հարցում»,- ուրբաթ հայտարարել է Թայվանի առաջնորդի մամուլի քարտուղար Քարեն Կուոն՝ պատասխանելով Ցաոյի հայտարարությունների վերաբերյալ հարցին։
Դեկտեմբերին ԱՄՆ նախագահ Դոնալդ Թրամփի հանրապետական վարչակազմը թույլատրել էր Թայբեյին 11 միլիարդ դոլարի զենքի մատակարարումը, սակայն մինչ այժմ առաջընթաց չի գրանցվել։ Ամերիկացի օրենսդիրները հունվարին հավանություն են տվել նաև Թայվանին զենքի վաճառքի առանձին՝ 14 միլիարդ դոլարի գործարքին, թեև գործարքը չի կարող կնքվել, քանի դեռ Թրամփն այն պաշտոնապես չի ներկայացրել ԱՄՆ Կոնգրեսին։