Այն օտարերկրացիները, որոնք ցանկանում են փոխել իրենց ներգաղթային կարգավիճակը Միացյալ Նահանգներում՝ գրին քարտ ստանալու համար, ստիպված կլինեն դա անել երկրից դուրս՝ Պետքարտուղարության միջոցով, ուրբաթ օրը հայտնել է ԱՄՆ քաղաքացիության և ներգաղթի ծառայությունը, հաղորդում է Reuters գործակալությունը։
ԱՄՆ քաղաքացիության և ներգաղթի ծառայությունը (USCIS) դրա մասին հայտնել է պաշտոնական գրության մեջ, որով հանձնարարվում էր աշխատակիցներին յուրաքանչյուր կոնկրետ դեպքում հաշվի առնել համապատասխան գործոններն ու տեղեկությունները՝ որոշելու համար, թե արդյոք արդարացված է արտակարգ օգնության տրամադրումը։
ԱՄՆ-ում ժամանակավորապես գտնվող և գրին քարտ ստանալ ցանկացող օտարերկրացին պետք է վերադառնա հայրենիք՝ դիմում ներկայացնելու համար»,- ասված է ԱՄՆ ներքին անվտանգության նախարարության հաղորդագրության մեջ, որը համակարգում է USCIS-ի գործունեությունը։
«Այս քաղաքականությունը թույլ է տալիս, որ մեր ներգաղթային համակարգը գործի այնպես, ինչպես նախատեսված է օրենքով, այլ ոչ թե սողանցքներ ստեղծի»,- ընդգծել են ծառայությունում։
USCIS-ում հայտարարել են, որ նոր քաղաքականությունը կազատի գործակալության ռեսուրսները՝ հնարավորություն տալով կենտրոնանալ այլ գործերի քննության վրա։
HIAS օգնության կազմակերպությունը, որն ի թիվս այլ ներգաղթյալների խմբերի ծառայություններ է մատուցում նաև փախստականներին, հայտարարել է, որ ԱՄՆ անվտանգության ծառայությունը մարդկանց թրաֆիքինգից տուժածներին, ինչպես նաև դաժան վերաբերմունքի արժանացած ու անխնամ մնացած երեխաներին ստիպում է վերադառնալ այն վտանգավոր երկրներ, որտեղից նրանք փախել են, որպեսզի մշակվեն ԱՄՆ-ում մշտական բնակության իրավունք տվող նրանց գրին քարտերի դիմումները։
Անցյալ տարի ԱՄՆ նախագահ Դոնալդ Թրամփի վարչակազմը որոշում էր ընդունել կրճատել ուսանողների, մշակութային փոխանակման ծրագրերի մասնակիցների և լրատվամիջոցների ներկայացուցիչների վիզաների գործողության ժամկետը։
Հունվարին Պետքարտուղարությունը հայտարարել էր, որ մեկ տարի առաջ Թրամփի պաշտոնը ստանձնելուց ի վեր գերատեսչությունը ավելի քան 100 հազար վիզա է չեղարկել։