ԱՄՆ արդարադատության նախարարությունն ընդունել է, որ իր կայքից հեռացրել է 2021 թվականի հունվարի 6-ի անկարգությունների՝ Կապիտոլիումի գրոհի հետ կապված քրեական գործերի մասին մամուլի հաղորդագրությունները՝ դատական հետապնդումների մասին տեղեկությունն անվանելով «պարտիզանական քարոզչություն», հայտնել է Associated Press-ը։
ԱՄՆ նախագահ Դոնալդ Թրամփը 2025 թվականի հունվարին պաշտոնին վերադառնալու առաջին օրը ներում է շնորհել, մեղմացրել է ազատազրկման ժամկետները կամ խոստացել է փակել Կապիտոլիումի գրոհի ժամանակ հանցագործությունների մեջ մեղադրվող ավելի քան 1 500 անձանց բոլոր գործերը, այդ թվում՝ նրանց, ովքեր դատապարտվել էին սպաների վրա հարձակվելու համար՝ օգտագործելով ինքնաշեն զենքեր, ինչպիսին են դրոշակաձողերը, հոկեյի մահակները և հենակները։
Երկուշաբթի արդարադատության նախարարությունը հայտարարել է 1,776 միլիարդ դոլարի հիմնադրամ ստեղծելու մասին, որը նախատեսված է փոխհատուցումներ վճարելու Թրամփի դաշնակիցներին, որոնք կարծում են, որ իրենց նկատմամբ իրականացվել են անարդար հետաքննություններ և պատասխանատվության միջոցներ։
Գլխավոր դատախազի պաշտոնակատար Թոդ Բլանշը չի բացառել, որ անկարգությունների՝ բռնության համար դատապարտված մասնակիցները կարող են իրավունք ունենալ ստանալու վճարումներ, ինչը Կոնգրեսի երկու կուսակցությունների զայրույթն է առաջացրել։ Այն բանից հետո, երբ ուրբաթ լրագրողը սոցցանցում նկատել էր, որ արդարադատության նախարարությունը «գաղտագողի» իր կայքից հեռացնում էր հունվարի 6-ի հարձակման հետ կապված նորությունների հրապարակումները, այդ թվում՝ Տեխասի մի բնակչի մասին, որն իրեն մեղավոր էր ճանաչել հարձակման մեջ, ինչպես նաև առանձին նահանգային մեղադրանքների էր բախվել անչափահասի նկատմամբ ոտնձգության գործով, նախարարությունն արագ արձագանքել է հաշվետվությամբ՝ հայտարարելով, որ դրանում «ոչ մի գաղտնի բան չի եղել»։
«Մենք հպարտ ենք, որ Բայդենի վարչակազմի օրոք կանգնեցրել ենք արդարադատության նախարարությունը զինելու փորձերը։ Մենք կանենք ամեն ինչ՝ մեր ուժերի սահմաններում, որպեսզի փրկենք նրանց, ովքեր ենթարկվել են քաղաքական դրդապատճառներով հետապնդումների, – նշվել է հաղորդագրության մեջ։ – Դա ներառում է նաև արդարադատության նախարարության կայքը պարտիզանական քարոզչությունից մաքրելը»։