ԱՄՆ-ի և Իրանի միջև համաձայնագրի շրջանակում Հորմուզի նեղուցը կբացվի, Truth Social սոցցանցում հայտնել է ԱՄՆ նախագահ Դոնալդ Թրամփը։
«Ես գտնվում եմ Սպիտակ տան Օվալաձև աշխատասենյակում, որտեղ հենց նոր շատ հաճելի զրույց ունեցանք Սաուդյան Արաբիայի թագաժառանգ Մուհամմեդ բեն Սալման Ալ Սաուդի, Արաբական Միացյալ Էմիրությունների նախագահ Մուհամմեդ բեն Զայեդ Ալ Նահյանի, Կատարի էմիր Թամիմ բեն Համադ բեն Խալիֆա Ալ Թանիի, վարչապետ Մուհամմեդ բեն Աբդուլռահման բեն Ջասիմ բեն Ջաբեր Ալ Թանիի և Կատարից նախարար Ալի ալ-Թավադիի, Պակիստանից ֆելդմարշալ Սայեդ Ասիմ Մունիր Ահմեդ Շահի, Թուրքիայի նախագահ Ռեջեփ Թայիփ Էրդողանի, Եգիպտոսի նախագահ Աբդել Ֆաթթահ աս-Սիսիի, Հորդանանի թագավոր Աբդալլահ II-ի և Բահրեյնի թագավոր Համադ բեն Իսա Ալ Խալիֆայի հետ՝ կապված Իրանի Իսլամական Հանրապետության և այն ամենի հետ, ինչ առնչվում է Խաղաղության վերաբերյալ փոխըմբռնման հուշագրին։
Համաձայնագիրը, որը մեծապես համաձայնեցված է Ամերիկայի Միացյալ Նահանգների, Իրանի Իսլամական Հանրապետության և ցանկում նշված տարբեր այլ երկրների միջև, ենթակա է վերջնական մշակման։
Առանձին հեռախոսազրույց եմ ունեցել նաև Իսրայելի վարչապետ Բիբի Նեթանյահուի հետ, որը նույնպես շատ լավ է անցել։ Ներկայումս քննարկվում են գործարքի վերջնական կողմերն ու մանրամասները, որոնց մասին կհայտարարվի շատ շուտով։ Համաձայնագրի բազմաթիվ այլ տարրերից բացի, Հորմուզի նեղուցը կբացվի»,- գրել է ԱՄՆ նախագահը։