Մայիսի 26-ին ամենամյա ուսումնական այցի շրջանակներում Բելգիայում ՀՀ դեսպանությունը հյուրընկալել է ՀՀ ԱԳ նախարարության դիվանագիտական դպրոցի 2025-2026թթ․ ունկնկդիրներին։
Բելգիայի ներկայացուցիչների պալատում ունկնդիրներին հյուրընկալել է նախագահ Պետեր դը Ռուվերը, ով իր խոսքում անդրադարձել է միջխորհրդարանական հարաբերություններին, Հայաստան-Բելգիա համագործակցության խորացմանն ու ընդլայնմանն ուղղված ջանքերին։ Նախագահ դը Ռուվերը կիսվել է նաև վերջերս Հայաստան կատարած այցելության տպավորություններով՝ առանձնանշելով Հայաստանի արագ զարգացման կարևորությունը և պատասխանել ունկնդիրների կողմից հնչեցված հարցերին։
Այցի շրջանակներում ունկնդիրներն առանձնազրույց են ունեցել ՀՀ դեսպան Տիգրան Բալայանի հետ, ով ներկայացրել է ՀՀ-ԵՄ գործընկերության հիմնական ուղղությունները և բացվող հնարավորությունները՝ վկայակոչելով Հայաստան-ԵՄ առաջին գագաթնաժողովի կարևորությունը։ Դեսպան Բալայանը կարևորել է խաղաղությանն ուղղված ՀՀ կառավարության ջանքերը՝ ընդգծելով տարածաշրջանային կապուղիների ապաշրջափակման, «Խաղաղության խաչմերուկ» նախագծի իրագործման նշանակությունը։
Այցն ավարտվել է ունկնդիրների համար նախատեսված հյուրասիրությամբ, որտեղ ներկաներին հնարավորություն է ընձեռնվել կիսվել իրենց տպավորություններով և քննարկել Բրյուսելում ՀՀ դիվանագիտական ներկայացոցչությունների կողմից իրականացվող աշխատանքները։