Իտալիայի իշխանությունները կալանել են մաֆիայի հանգուցյալ պարագլուխ Մատեո Մեսինա Դենարոյի թմրանյութերի ցանցին առնչվող ավելի քան 200 միլիոն եվրո (232 միլիոն ԱՄՆ դոլար) արժողությամբ ակտիվներ, հայտնում է Associated Press-ը։
Մաֆիայի դեմ պայքարի դատախազությունը հինգշաբթի այս քայլը որակեց որպես հարված սիցիլիական մաֆիայի՝ իր ֆինանսական հզորությունը վերականգնելու փորձերին։ Ինչպես հայտնել են քննիչները մամուլի ասուլիսում, առգրավվել է ավելի քան 12 կիլոգրամ ոսկու ձուլակտոր, միլիոնավոր կանխիկ գումար, պրեմիում դասի ժամացույցներ և շքեղության մոտ 20 օբյեկտ։
Մեսինա Դենարոն մահացել է բանտային հիվանդանոցում 2023 թվականի հունվարին ձերբակալվելուց մոտ ինը ամիս անց՝ ավարտելով փախուստի մեջ անցկացրած իր երեսնամյա շրջանը։ Նրան հեռակա դատել և մեղավոր են ճանաչել տասնյակ սպանությունների մեջ, դրանց թվում՝ 1992 թվականի երկու պայթյունների կազմակերպման, որոնց հետևանքով զոհվել էին մաֆիայի դեմ պայքարի առաջատար դատախազներ Ջովաննի Ֆալկոնեն և Պաոլո Բորսելինոն։
Թմրամիջոցների ապօրինի շրջանառությանն առնչվող հետաքննության շրջանակում իշխանությունները ձերբակալել են երեք անձի և հրամայել կալանել ավելի քան 200 միլիոն եվրո արժողությամբ ակտիվներ, ընկերություններ և ֆինանսական հոլդինգներ։ Իտալիայի ֆինանսական ոստիկանության ավելի քան 150 աշխատակիցներ խուզարկություններ են իրականացրել Իտալիայում և արտերկրում, ներառյալ՝ Անդորրայում, Ջիբրալթարում, Կայմանյան կղզիներում, Շվեյցարիայում, Լիբանանում, Մոնակոյում և Իսպանիայում։
Իտալիայիմ դեմ պայքարի ազգային դատախազ Ջովաննի Մելիլոն հայտարարել է, որ կալանքները սիցիլիական մաֆիայի տնտեսական ենթակառուցվածքը ապամոնտաժելու և գլոբալ ֆինանսական ու սոցիալական ազդեցություն (ներառյալ՝ ահաբեկում) գործադրելու ընդունակ հանցավոր ցանցերի վերականգնումը կանխելու ավելի լայն ջանքերի մի մասն են։